英國開學日

等咗5個星期暑假，小妹終於都開學喇，萬母興奮到早一晚失眠呀！

今次係小妹第一次參加英國小學嘅開學日，因為舊年做插班生，冇試過正式開學，小妹話係有開學禮(assembly)嘅，佔咗第一堂嘅時間，至於講過D咩，小妹話都係嗰D喇，放學時已經唔記得曬。

今次都係萬母第一次踏入英國小學嘅校園，先前半年家長們都止步於學校門口，今日終於可以入校園參觀參觀喇，可以將小妹送到課室門口。

小妹學校佔地都算好大吓，除咗有個籃球場，仲有個大草地，怪唔知小妹成日放學返嚟，件褸或者鞋入面都搵到草喇。仲有小妹口中嗰個井，萬母終於知道係咩東東喇。

學校環境咁優美，真係喺香港難搵，希望小妹繼續開開心心返學喇。