飢餓遊戲~劇場版

小妹迷上咗飢餓遊戲，睇咗成套書，睇埋戲，今次連劇場版都睇埋。

先前個劇場未起好時，小妹已經嗌去睇，一拖再拖，而家先去。

個劇場喺金絲雀碼頭(Canary Wharf)，英國嘅金融中心，倫敦版嘅中環，金絲雀碼頭同倫敦市中心真係完全兩種感覺，充滿玻璃幕牆嘅高樓大廈，真係似香港多過英國。

個劇場其實好細，就算坐最後一排，都同個舞台好近，而且呢個舞台係喺地面，並無升高。

入場唔可以帶食物，相機，一係就要掉咗佢/食咗佢，一係就被收，完場先可以領回。

之但係，其實而家部部電話都影到相影到片，電話又可以帶入場，所以個邏輯真係唔太明白。

講返套劇，如果有興趣入場，一定一定一定要做咗功課先，否則會跟唔住劇情，因為都跳得幾快，好彩我哋煲咗第一套戲先入場，完場仲有小妹解釋一D我哋睇唔明嘅地方。

睇完劇，我哋去咗附近食鼎泰豐，味道係好嘅，不過價錢偏貴，份量又偏少，間唔時食一次係可以嘅。