Penrhyddion Ucha @ North Wales

平時萬母好少介紹去玩時嘅住宿，皆因鹹魚白菜各有所好，但今次破例講吓，原因係我哋喺North Wales嗰幾日，其實撞正打風，係有名嗰種storm，其中一日，我哋決定足不出戶，瞓到飽飽就起身食Lunch，然後喺間airbnb度玩，玩到夜晚就食dinner，黃昏時，屋主仲專登message我哋，叫我哋快D叉爆電話，因為有可能會停電，但幸好最後都安然渡過。

住嘅地方近Betws-y-Coed，但其實喺個私人農場入面，返去Betws-y-Coed約10分鐘車程。

喺呢間cottage旁邊有個牛欄，冇錯，一落車就聞到牛屎味，但好彩入屋就冇味。cottage周圍都係草坡，亦係羊羊嘅屋企，我哋住嗰幾晚就係咁被羊圈，晨早就會聽到咩咩叫，喺廚房食嘢時又突然有羊BB望實我哋，總之每個窗望出去都會見到羊，窗外嘅景色就好似畫咁靚。

而我哋去嗰排係春天，所以好多羊BB，cottage旁邊仲似乎係個羊仔幼兒園，見到好多羊媽媽帶住羊BB，所有動物，包括人類，仍喺BB階段嘅時候真係好趣緻嘅。

呢間cottage除咗有羊，仲有個bonus，就係一個game room，雖然唔係好豪華嗰種，但都足夠我哋玩半日，輕輕鬆鬆開開心心咁過咗一日偽resort日子。

想喺呢間cottage閒過一日，記住要一早準備食物，皆因deliveroo並不提供服務嘅。

呢間cottage其實都有缺點嘅，就係住後會有PTSD，我哋返到倫敦頭幾日都仍然時不時聽到咩咩咩，幻聽非常嚴重。