春天來了，又係發花癲時間，今次發嘅花癲係紫藤花(Wisteria)。
如果有入任何種植谷，必定曾被紫藤洗版，曾經萬母都被荼毒到想買棵嚟種，但又怕自己殘害生命，所以作罷；只係路過人哋屋企，見到人哋嘅紫藤開到一串串，就羨慕吓咁。
點知原來上帝早有預備，上手業主原來留落咗一棵紫藤，而呢棵紫藤喺我哋入伙第一年只有葉，並無花，所以萬母有眼不識泰山，第二年阿紫藤姐開咗兩朵花，到第三年開始多D嘢睇，今年第四年終於有澎湃嘅感覺喇，yeah!
講開花，呢期路邊都開咗好多野花，望住呢D花花，令萬母諗起五年前，剛剛嚟到英國無耐，過咗個冬天，經歷咗一場雪，捱過咗壞boiler嘅日子，春天開始回暖，有陽光，lockdown完，有次行返屋企時，見到路邊嘅花，突然覺得好驚艷，原來大自然咁神奇，唔同嘅花，唔同款唔同色，但全部都咁靚，這就是天父世界，點解喺香港時無發現嘅，當刻萬母喺心入面提醒自己，千祈唔同忘記呢刻嘅感動，千祈唔好因為見多咗就習慣咗，要記住呢刻嘅感動，要記住天父世界嘅美妙！
#這是天父世界
沒有留言:
發佈留言