喺Haven Holidays玩咗5日，臨離開Lakeland前，我哋決定去小妹最喜愛嘅farm park走一轉，揀中呢個farm park，原因係佢個大迷宮。
Farm park有動物睇，有動物餵係基本盤，仲有children's playground，跳彈床，長滑梯，夏天仲有水彈，同埋最吸睛嘅大迷宮。入場時，售票員會問你駛唔駛買迷宮地圖，盛惠£1，如果最後冇開封過張地圖，係可以退款嘅。
好喇，到重點喇，就係個迷宮，其實迷宮分兩部份，mini版與正常版，入迷宮前要先睇安全指引，每組都要拎支紅旗，萬一有咩事要求救，高舉紅旗等救援就得，安全影片仲話如果到6點你架車都仲未離開停車場，直昇機就會嚟救你。
嘩，聽落好似好serious咁，個迷宮究竟有幾堅呢？
我哋用咗半個鐘去完成mini迷宮，包括搵出口同checkpoint，完成mini迷宮後，萬母決定要先醫肚，因為大迷宮比mini迷宮大6倍！
食飽飽，去埋廁所，我哋就去挑戰大迷宮喇，迷宮係用粟米植物組成，棵棵都好高大，喺入面真係無法知道自己喺邊，要搵出口唔係最難，最難係要搵埋check points，我哋喺大迷宮迷咗90分鐘，為咗唔駛搭直昇機離開，最後決定放棄check points，直接去搵出口，好彩順利走得甩。
呢個迷宮連小妹都話勁，鍾意挑戰呢類活動嘅大小朋友絕對唔好錯過，迷宮由7月開到9月，夏季限定。
https://www.lakelandmaze.co.uk/
沒有留言:
發佈留言