再次見工記

試過返工做監考員，萬母開始有興趣再搵工，目標係長期兼職。

其實係暑假前，6-7月期間，好多學校已經出ad請人，包括老師同助教，助教嘅門檻唔高，如果喺香港教開書嘅都一定夠資格，可惜萬母唔想返全職，只想搵兼職。

某日，萬母發現屋企附近間中學請兼職SEN助理，就即管試試。估唔到真係有得面試，面試期間都係自我介紹一下，簡介吓中學畢業之後嘅經歷(讀過咩書，做過咩工)，跟住又講吓試過最難攪嘅家長投訴係咩。

除咗傾吓計，呢間學校仲有個電腦測試畀萬母，總共有3個模擬tasks.

1. 覆家長嘅投訴電郵
2. 編下個月嘅督學訪校時間表
3. 幫校長用excel整理學生出席數據當晚開校董會用

佢哋叫萬母先將呢3個tasks分優次，然後就由最優先嗰個開始做, 20分鐘做唔完都即止。開始之前，書記嬸嬸仲問萬母有冇用過excel添。

見完工，過咗半個鐘左右，萬母就收到電話話有Offer喇，真係估唔到咁順利。

其實萬母去監考嗰間學校都叫萬母去申請做TA，但因為一星期要返五日工，所以萬母就婉拒咗。

經過萬母嘅真人實驗，要搵工真係唔難，但就一定唔好將香港份糧同英國份糧比較，豉油呢家野，係錢換唔到嘅。

#圖文不符

圖為小妹學校嘅colour run活動，班細路一邊跑，班老師一邊撒色粉，D細路去到終點時變晒彩虹俠。用香港嘅思維，好難想像學校會咁同佢哋玩，但班細路又真係玩得好開心喎。