時間： 某日夜晚
地點： 屋企一樓個浴室
事情：
某日夜晚，當萬能家出完街返到屋企時，萬母打開一樓浴室嘅門，見到圖1中境況，嚇咗一大跳。
浴室架膠車仔，平時泊喺窗邊角落，出門口前萬母都肯定已泊好車，但一開門竟然見到架車仔瞓低咗。
莫非被風吹？但係就算幾大風應該都吹唔低架車仔，而且泊喺窗邊應該係最唔當風嘅地方。
有賊入屋？萬能生即時去檢查，間屋冇其他異樣，一切正常。
咁究竟發生咩事呢？
經過大小偵探去偵查後，我哋懷疑係浴室個窗開大咗，隔離屋隻貓經窗口跳咗入屋，整跌咗架車仔，玩完一輪之後就經窗口走咗，我哋咁樣推敲，係因為浴室窗台有兩條毛，顏色同隔離屋隻貓吻合。
好彩，好彩浴室度門閂實咗，否則隻貓通屋走就麻煩喇。
隔離屋呢隻貓成日都周街走，時不時喺我哋花園散步，隻貓試過企喺我哋花園度玻璃門前望住屋入面嘅我哋，又試過企喺我哋大門口喵喵叫，佢主人話佢會走入鄰居屋企坐吓添，所以萬母每次返屋企都嗱嗱臨閂門。
不過點都唔及佢兄弟誇張，佢兄弟直情係離家出走咗，住咗喺鄰居屋企添，真係貓生外向。
圖2為疑犯無格仔近照。
上年一解封，我哋就去咗溫莎堡探女皇。
https://www.facebook.com/permalink.php?story_fbid=240187447910877&id=106304157965874
今年我哋趁年票未到期，就再去探多次女皇。
要用年票(1-year pass)入場，一係就先用電話預約(但要收£2手續費)，一係就walk-in去換即日飛。
今次女皇唔喺屋企，小妹話唔知係咪去咗坐過山車喎。
但我哋舊年入唔到嘅St George's Chapel同Queen Mary's Dolls' House都有開，可以補返上次嘅不足。
起初以為Queen Mary's Dolls' House係擺咗好多洋娃娃公仔，但原來唔係，係公仔屋，即係類似森林家族屋咁，但係阿Queen Mary(即係女皇阿嫲)呢間就大好多，仲要係專業建築師設計，又有好多好精細嘅家俬電器，鍾意屋仔嘅朋友應該會好羨慕。
St George's Chapel好宏偉，好靚，特別係佢D彩色玻璃窗，呢間教堂仲係運作中，日日都有崇拜，聖喬治禮拜堂亦都皇室婚禮嘅舉行地點，哈利王子都係喺呢度同梅根結婚。仲有好多個英國嘅皇帝同皇后埋葬咗喺呢度。
一年後舊地重遊，小妹返學學多咗英國歷史，萬母又剛剛咪完life in the UK，有D歷史底，今次終於知道牆上嘅畫像係邊個，唔駛再傻更更唔知做咩喇。
喺復活節假要閉關，當然唔好嘥咗D時間，溫Life in the UK最實際。
要申請永久居留或者係入藉英國，就要考Life in the UK test，但有D人係唔駛考嘅，例如18歲以下或65歲以上，或者係患有慢性身體或精神疾病人士都免試。
呢個test一次Pass，終身受用，所以趁有時間溫書時，可以考咗先，免得5年後臨急臨忙。
45分鐘內要答24條題目，答啱18條以上先算合格。
要報名可以去官網，開個account，畀錢就得，報名費每次£50。
https://www.gov.uk/life-in-the-uk-test
先講吓萬母嘅溫書策略，萬母係傳統讀書人，即係鍾意拎住實體書嗰種老土人，所以晨早已經買咗本二手Life in the UK書，本書D英文其實唔難，要睇可以好快睇得完，但春天不是讀書天，夏日炎炎正好眠，所以拖咗好多個月先水過鴨背咁睇完本書.
之後萬母就上網站做mock tests，雖然書已睇完，但做mock test時依然唔知佢講咩，唯有一邊做，一邊又揭吓書睇吓，當D mock tests操得多時，其實發現嚟嚟去去都係問嗰D野，錯多幾次就慢慢記得。下面係mock tests網站。
呢個網站有Life in the UK電子書，40個tests，16個exams，每個chapter都有小測。
https://lifeintheuktestweb.co.uk/
呢個網站有39個tests，每個chapter都有小測。另有付費會員選擇，畀£4.99就可以做membership，可以睇唔同語言嘅翻譯版Life in the UK study guide。
https://lifeintheuktest.net/
呢個網站都係分免費版同付費版，免費版就可以做到15個tests，付費版就做到45個。
https://lifeintheuktests.co.uk/
操mock test操到每次都啱20題以上就已經夠pass，操卷對於香港嘅填鴨嚟講應該唔難，只要肯操就得。所以有信心時，就可以去報名考試。
跟住就講吓考試當日嘅流程先，去到報到要先量體溫同洗手，鎖晒D私人物品入locker後，就核對身份，影相，之後就檢查全身嘅衫/褲袋，之後仲要檢查耳背，要整起手袖檢查手踭，仲要整起褲腳同襪檢查腳踭，之後職員仲拎住個金屬探測器檢查全身，都真係幾誇張。
檢查完終於可以埋電腦答問題，萬母覺得考試嗰24題比上面D mock容易，萬母溫書時對D人名同年份好掙扎，特別係D運動員同發明家，對於呢類題目已經半放棄，好彩真考試時只係問咗1-2題，嗰24題都算簡單直接。
考完之後，大約10分鐘就會收到email通知結果，Pass咗會有Unique Reference Number (URN)，要好好保存，第時申請永居時要用。
祝大家一take pass，順順利利！
圖為萬母嘅私家筆記，由於年紀大，記憶衰退，要靠圖/表先可以記到野。
無錯，我哋中招了~
喺愚人節嘅晚上，萬母做快速測試發現兩條線，中招了。
回顧返成個患病過程，幸好病徵唔算嚴重，發咗一日燒(兼有發冷)，但快測一條線。
之後就只有鼻水同痰，以為自己冇事，但再做快測時，竟然係中咗。
由初現病徵到最後clear變返一條線，總共用咗10日。
雖然我哋已經盡量隔離，包括分開房瞓，分開廁所用，分開食飯，但最後全家都係中曬。
仲要係萬母clear先到小妹兩條線，所以成個復活節假就係用嚟自我隔離。
但其實而家英格蘭係直接躺平，就算positive咗都唔駛強制隔離，只係勸你自我隔離5日，同埋10日內避免接觸高危人士。
但我哋好乖，等到大家都clear曬先出山。
喺我哋隔離嘅兩星期中，好多單位都好關心我哋，甚至將食物送到屋企門口畀我哋，簡直係人間有愛。
好彩我哋住喺自由嘅土地上，如果喺"腥港"，萬母應該會驚被送入方艙，如果喺"下海"，應該會擔心餓死。
感恩有個復活節假畀我哋安心自閉，唔駛擔心返唔返學，會唔會中咗未知。
小貼士：
🔸有病徵都未必即刻驗到兩條線，所以如果有病徵，穩陣起見每隔2日要測一測。
🔸快測說明書會講明，限定時間內嘅結果先準確，過咗時就唔準，但我哋發現如果條快測擺得耐而出咗淡淡嘅T線，有可能係感染初期或者康復尾聲，都要留意。
🔸圖為偏廳嘅梳化床，本來係當客床用，但用咗嚟做隔離設備，小妹瞓到唔肯搬返自己房，佢話好舒服喎。
由於我哋本身嘅租約未完，所以要喺搬出前2個月書面退租。
當我哋send咗email畀agent話退租後，一星期後，agent已經安排人上嚟睇樓，無錯，喺英國，份租約寫明，租約期滿前，業主係可以安排新租客上嚟睇樓，而舊租客可以要求協調時間，但係唔可以拒絕嘅。
為咗令間屋快D租得出，唔駛開咁多次門畀人入屋睇樓，所以人哋嚟睇樓前都稍為收拾一吓。
最後只係睇咗兩轉，間樓已經再成功租出。
不過故事仍有手尾，話說新租客係靠agent做video call嚟安排睇樓，呢個agent其實唔多守規矩，明明要24小時前通知，但佢只係早2-3個鐘打電話嚟，都算喇，見得閒咪由得佢嚟囉，快D租得出，我哋都可以煩少D。
點知，呢個agent除咗唔守規矩，仲有D思覺失調，有一日佢打嚟問我哋可唔可以早D退租，又講到為我哋著想咁，又話可以慳D租，起初我哋都話要計一計先，之後佢又追魂call咁，到好喇，答咗佢話可以早2星期退租，請佢同業主攪文件後，一等再等，等到我哋搬走咗，吉咗間屋喇，都冇聲氣，打畀佢問攪成點，佢竟然聲大夾惡咁話要三方同意先可以提早退租，唔係我哋想退就退。
當刻真係想少爆佢，又係佢自己奪命追魂call咁打嚟，係咁叫我哋早D走，答咗佢之後又話我哋唔係想退就退，都真係嚴重思覺失調。
算喇，呢2個星期租我哋一早預咗要畀，只不過冇得慳皮D。
之但係，思覺失調agent並未病好，過幾日佢又打電話問我哋幾時交鎖匙，答咗佢租約最後嗰日會交畀上嚟check屋嘅inventory clerk，點知隔咗幾日，agent公司個RM打嚟，佢話阿agent投訴我哋唔肯交鎖匙(refuse to return keys)，當刻都係又想少爆佢，好彩阿RM都算好聲氣，我哋再重申會喺租約last day交畀inventory clerk。
個agent都真係short嘅，就算我一早搬咗，間屋吉咗，一日我仲交緊租，當然都keep住條鎖匙喇，做咩要提早畀條鎖匙佢呢。
呢個agent真係好心急拎條鎖匙，最後佢係喺租約last day嗰日，喺inventory clerk手上即刻拎走條鎖匙，而過2日我哋已經見到舊屋有燈，有人入住咗。
呢個故事教訓我哋：
🔸F字頭嘅agent都係唔多可靠，呢年幾我哋領教過好幾次
🔸講100%sure嗰D人都係大話精，200%信唔過
🔸Rightmove嘅租盤有機會係已租出先上架，我哋舊屋就正正係咁，租出後先見到佢上架
交完鎖匙，故事未完，另一個退deposit嘅故事只係剛剛開始......
夏去秋來，冬去春來，四季都經過，終於都等到入伙期。
跟住就要計劃搬屋，由於我哋新舊屋距離實在太近，用腳行都只係幾分鐘步程，所以我哋並無請搬屋公司，而係用螞蟻搬家嘅形式搬屋。
船運到時，有一大批紙箱冇解封，呢批紙箱就係最先被搬嘅物品，跟住又將D唔急住嘅野入箱搬走，只留一D日日要用嘅必需品跟身，到最尾一日，跟人一齊搬。
用螞蟻搬屋嘅方法，需要分好多日搬，適合搬得近，如果搬得遠嘅話，真係租架貨車一次過搬冇咁費心。
今次搬屋，小妹們都有做蟻兵，用個背囊同手抽袋，將自己嘅圖書同玩具分批運走，都叫做有D貢獻。
螞蟻搬家，當然唔少得碌人情卡搵人幫手喇，因為有D大型傢俬，真係要最少兩個男人先攪得掂。
在此，特別鳴謝，曾經出力幫手嘅外援，"出外靠朋友"係真㗎！
偶然喺網上見人講呢本雜誌，見口碑唔錯，想買本嚟睇吓，點知搵勻各大超市都唔見有賣，最後都係上網買咗一本試讀。 睇過實物之後，覺得真心正，值得訂閱。 呢本雜誌嘅目標讀者係8-14歲嘅青少年，但萬母覺得大人都啱睇，特別係我哋呢D母語唔係英文嘅大人，因為有D生字，佢會配有英文解釋。 雜誌...
