Mead Open Farm 與聖誕老人相聚一刻

本來入冬之後，萬母已經處於半冬眠狀態，四圍都唔想去，只想留喺屋企嘆暖氣，但呢個與聖誕老人之約，係喺暑假時已經約好，所以唯有包到隻糭咁去赴約。

呢個本來又係一個有得玩有得睇動物嘅農場，但係聖誕期間加咗特別活動，重頭戲係同聖誕老人見面，要預早約時間不特止，仲要過五關斬六將，見聖誕老人之前要先見幾個elves，接受佢哋嘅測試或訓練，仲要過埋個nice or naughty x-ray機，先見得聖誕老人，同佢合照。

同聖誕老人影相都唔係是日主菜，小妹最期待嘅係去自己整毛公仔，可以揀自己鍾意嘅款式，再塞棉花入去，D公仔好矜貴㗎，仲有衫可以買畀佢哋著。整完公仔仲可以去玩具店揀份聖誕禮物拎走，小妹話選擇比想像中少，但都揀到心頭好。佢仲話真係好，唔駛錢有禮物拎，唉，要知道其實係阿媽一早畀咗入場費先得㗎。

見完聖誕老人，拎埋禮物，其實已經好心足，小妹仲去裝飾埋薑餅人，𢳂埋reindeer food(其實係幾款粟米片)返屋企，指引教喺平安夜，將D reindeer food灑喺花園，就會引到reindeer車聖誕老人嚟咁話。

聖誕特備節目係咁多，個farm其實仲有動物睇，有兔仔摸，仲有英國好常見嘅大型室內playroom，當然唔少得室外playground喇。最後我哋玩到天黑先走(其實而家四點幾已經天黑喇)。

起初萬母有擔心小妹會覺得好幼稚，但佢哋又好enjoy喎，呢個景點啱小學雞或以下去玩，中學生應該會覺得太低B。

https://www.meadopenfarm.co.uk/

💰💰超市行情：💰💰

入場費 £100

聖誕老人合照 £15 (最低消費，2張相+1個鎖匙扣，所以影2張相唔同嘅相最抵)

公仔衫 £15/2套