小學雞游水堂

小妹過去兩星期，剛剛跟學校上完10堂游水堂，雖然只係上兩星期，但萬母擔心咗四個星期。

未上堂前已經超級擔心，擔心小妹自己去泳池攪唔掂，會唔會唔見晒D野，著衫太慢會唔會冷親......

學校老師要求D細路朝早著埋泳衣喺校服入面返學，而女同學又要著一件頭泳衣，萬母嘗試問吓可唔可以著兩件頭，諗住方便D，但被老師拒絕，可能老師以為兩件頭即係比堅尼喇。

就係咁，萬母需要喺屋企教小妹點樣去廁所，仲要教佢去到泳池除咗D校服擺去邊，游完水點樣最快速抹乾身，著返校服。

小妹第一日游完水返嚟，萬母問佢有冇同學仔冇帶under，小妹話冇，但有同學冇除泳衣就著返校服，真係十萬個驚嚇，好彩喺屋企rehearsal過。

根據小妹形容，泳池水係暖嘅，唯一會凍嘅時間係上水後入更衣室前，所以佢哋都係急步入去。

教練根據游泳能力將全班分3組，最初階嗰組就扶住池邊學踢水，中階組就攬住浮板踢水，高階組就不停操水。兩個星期入面都有機會升組嘅。

最後一堂，小妹要求帶套睡衣去泳池，萬母初時聽到一舊雲，又泳衣又睡衣，攪咩，究竟係pyjamas poolside party定訓練著住衫嚟游水，真係唔知，只知英國嘅小學生活真係超出萬母嘅想像。

感恩平平安安渡過兩星期，冇穿冇爛冇唔見野，或者係時候去學習~放手，放開所有~~

#圖文不符