睇屋記(23)

呢間又係應agent邀請去睇嘅semi-detached，全屋1659呎，地下同閣樓都做晒extension。

先講入門口個玄關位，呢邊叫porch(門廊)，即係有兩度大門，入咗第一道之後，未入第二道之前嘅空間，唔係間間屋有，但萬母自己覺得有porch係幾好嘅，呢間屋仲要整咗個衣櫃喺porch，放大褸同鞋，想像吓，一返屋企就除咗件大褸掛喺門口大櫃，街外嘅污糟野就少咗帶入屋。

地下近門口有客廁，另有偏廳，同大廳相連，但有玻璃門相隔，開放式廚房連飯廳，個廚房有個island，island上有煮食爐(hob)，適合鍾意一邊煮飯一邊睇電視嘅人。

一樓有三房一廁，其中一間雙人房整晒書櫃書檯做咗書房，成個辦公環境好靚，仲要望住個花園辦公，不過屋主話呢間房嘅傢俬係會清走，只留吉房一間。

另一間睡房，做晒淡粉紅色入牆衣櫃，仲係好fancy好公主feel嗰種，連埋同款梳妝台，實在華麗到一個點。

再另一間房，雖然叫細房，但都比其他屋嘅細房大，放到雙人床，仲可以三邊落床。

頂樓係一間套房，又係做晒入牆衣櫃，空間好大。

成間屋其實感覺唔錯嘅，除咗間粉紅色房之外，廚廁都係米色或淺啡色，感覺溫馨，agent話6年前裝修過，眼睇唔算舊，如果要求唔高，真係可以拎行李就入住。但價錢真係唔平，可以話係好貴添，睇咗個樓市幾個月，感覺越嚟越貴，平價選擇越嚟越少。