參觀中學

 較早早早前曾經分享過升中派位機制(見下面條link)，每年10月，year 6(小學最後一年)嘅學生就要向council入紙申請中學。

升中派位機制(倫敦限定)

https://www.facebook.com/permalink.php?story_fbid=151763053419984&id=106304157965874

倫敦地區有6個選擇，雖然冇香港30個咁多，但要揀6個都要花D心機嘅。除咗去刨學校網頁之外，每年9-10月嘅開放日係好機會，可以去參觀學校，聽校長講野，再去見吓D學生，感受吓成間學校。

School tour都有分日間上堂時間同黃昏時間，萬母自己就比較鍾意日間去，因為可以睇吓學生嘅上堂情況，小息情況，感覺全面D，少D添加。

雖然未輪到小妹揀學校，但盡責嘅書僮都趁機去參觀吓學校，唔同學校嘅感覺真係唔同，有校舍好新好潮嘅，有充滿古典氣息，入到去嘅感覺似返到萬母中學時代咁嘅，亦有成個走廊掛滿英國著名女性相片嘅女校。

英國嘅中學生除咗要讀英文之外，仲要讀多科外語，有D學校硬性規定讀法文，有D法文/西班牙文二選一，有D就初中要讀晒兩種文。

萬母問帶隊參觀嘅同學仔，係咪要讀cookery同needlework，同學仔好似望見外星人咁望住萬母，隔離個家長就提萬母，而家唔係咁叫，係food technology。好明顯係有代溝同文化差異喇。

如果錯過咗今年嘅開放日，可以試吓上校網，因為疫情關係，好多學校都將校長講座嘅錄影放咗上網，亦有好多科目介紹都放咗上網畀人慢慢睇。

做人阿媽真係需要好多智慧，又要睇吓學校好唔好，又要睇吓適唔適合自己個細路，仲要睇個細路鍾唔鍾意，最慘仲有代溝同文化差異，真係要惡補吓先得。書僮們，共勉之！

教養孩童，使他走當行的道，就是到老他也不偏離。(箴言22:6)