蕃茄雞肉飯

萬母承認自己係懶惰，成日都想諗辦法用最簡單嘅方法去完成要做嘅野，包括煮飯。

懶到一個點，決定試煮早幾年好熱門嘅蕃茄電飯煲飯。

1. 洗好米放入飯煲，比煲白米要減少水量

2. 洗好蕃茄，去椗，底部界十字，放飯煲正中間

3. 將醃好嘅雞肉圍住蕃茄放

4. 開掣，煮飯

因為蕃茄會出水，煮飯時要減水量。

一煲過煮熟咗，只要撈勻就食得，方便到暈。

一打開飯煲，D飯香噴噴，不過可能落得太多豉油去醃雞，煲飯變咗啡色而唔係紅色。

正當萬母覺得成果唔錯之際，小妹一輪咀係咁嘈，內容大約係問萬母做咩要拎佢哋嚟做實驗，點解唔只係午餐煮畀爸爸食，點解要佢哋做白老鼠。

好彩冷靜過後，小妹都食咗碗蕃茄飯，呢個飯真係超級超級易整，仲好慳水慳力，一定要再翻炒先得，甚至考慮一星期煮幾次。