超市蛋糕

小妹牛一，決定試食超級市場嗰D唔駛雪，又擺到幾日嘅蛋糕。

先講吓D蛋糕嘅外型，老實講，都幾靚仔嘅，因為有層糖皮，所以可以整好多靚靚裝飾，小妹揀咗個比較簡約嘅蛋糕，只因佢貪上面個皇冠。其實萬母覺得比卡超，peppa pig嗰D仲靚，不過當然由壽星話事喇。

輪到個內涵喇，起初擔心呢D蛋糕會甜到蛀牙，但食落又OK喎，雖然都係偏甜，但入到口，小妹仲讚好味添，不過層糖皮就真係太甜喇。

超市蛋糕，比想像中好食，平平哋，靚靚哋，都不失為一個好選擇。

💰💰超市行情：💰💰

8寸蛋糕 £11

氫氣球 £2.8

偽~青紅蘿蔔湯 加強版

parsnip湯有陣草青味，但都要清咗D存貨佢。

所以今次加埋無花果乾同腰果一齊煲。

今次煲齋湯，因為雪櫃冇肉，但最後竟然多油過用肉煲，真奇怪。

落咗無花果乾係甜嘅，亦都蓋過咗陣草青味，結論係飲得碗落嘅。

終於等到NI number

NI number即係national insurance number(國民保險號碼)，如果喺英國返工，就需要NI number嚟交"保險"。

要申請NI number，去下面官網有得㩒。

https://www.gov.uk/apply-national-insurance-number

萬母到步初期，係要打電話去申請NI number，當時流傳要等2個半鐘先會有人接電話，萬母耐性不足，等咗半個鐘就放棄咗。

直至visa批咗再去申請，已經轉做網上㩒，唔駛再打電話，喺網上填完資料，需要印張表出嚟簽名，之後寄返去，然後就係等。

官網指示話要等16個星期，期間請保持耐性，"不要催，只要等"，時候到了，NI number自然會到，就係咁，等到唔記得自己申請過NI number時，郵差叔叔就會將佢帶上你屋企㗎喇。

萬母真係足足等咗18個星期，就收到NI number，萬能生同時間申請，同一日寄出，但要等多2星期先收到，但總算收到了，呢個NI number係用一世嘅，所以要好好保存。

等NI number要訣：耐心等，盡快忘記佢，時候到了就會有驚喜。

蕃茄雞肉飯

萬母承認自己係懶惰，成日都想諗辦法用最簡單嘅方法去完成要做嘅野，包括煮飯。

懶到一個點，決定試煮早幾年好熱門嘅蕃茄電飯煲飯。

1. 洗好米放入飯煲，比煲白米要減少水量

2. 洗好蕃茄，去椗，底部界十字，放飯煲正中間

3. 將醃好嘅雞肉圍住蕃茄放

4. 開掣，煮飯

因為蕃茄會出水，煮飯時要減水量。

一煲過煮熟咗，只要撈勻就食得，方便到暈。

一打開飯煲，D飯香噴噴，不過可能落得太多豉油去醃雞，煲飯變咗啡色而唔係紅色。

正當萬母覺得成果唔錯之際，小妹一輪咀係咁嘈，內容大約係問萬母做咩要拎佢哋嚟做實驗，點解唔只係午餐煮畀爸爸食，點解要佢哋做白老鼠。

好彩冷靜過後，小妹都食咗碗蕃茄飯，呢個飯真係超級超級易整，仲好慳水慳力，一定要再翻炒先得，甚至考慮一星期煮幾次。

Zippos Circus 馬戲團

帳幕馬戲團，以往只係喺電視睇過，今次有幸親身經歷，八個字可以形容得到，"精彩絕倫！拍爛手掌！"。

成個表演歷時2個鐘左右(設中場休息)，一邊睇一邊感嘆，要付出幾多努力先可以練成今日嘅表演。

入場券分3類座位，最貴嘅Ringside最近個台，其次係Deluxe Grandstand，即係看台嘅頭幾行，最平係Grandstand，即係看台後部，因為不設劃位，所以想坐正台中間嘅靚位就要早D去排隊。

萬母一直以嚟有個錯誤觀念，以為馬戲團會有"大笨象會跳舞　馬騮仔會上樹　長頸鹿會打觔斗"，可惜係冇嘅。

Zippos Circus會去唔同地方巡迴表演，去官網可以睇到將會到咩地方，同埋買飛，留意有時會有discount code出現，30% off會抵好多。

官網：

https://www.zippos.co.uk/

偽~青紅蘿蔔湯v3

又係入實驗室煲蘿蔔湯系列，今次用parsnip扮青蘿蔔。parsnip又係咩東東呢？

//歐防風（學名：Pastinaca sativa）為傘形科歐防風屬的植物，分布在歐洲等地，目前已由人工引種栽培。

歐洲防風，民間俗稱「芹菜蘿蔔」，又稱防風草、美洲防風、歐防風、歐洲蘿蔔、蒲芹蘿蔔、歐獨活、白甘筍。

歐洲防風營養極為豐富，碳水化合物含量很高，營養與馬鈴薯類似. 與胡蘿蔔相比，歐洲防風在乾物質含量上占上風。最特別的一點，歐洲防風胡蘿蔔素含量很少，但含鉀尤其豐富。//

parsnip個外型有少少似白蘿蔔，煲出嚟嘅湯有D草青味，小妹唔知點解話有"金屬"味。

綜合三種偽~青蘿蔔，蕪菁甘藍(swedes)煲出嚟嘅湯最甜，最易入口，起碼小妹飲起嚟都冇呱呱嘈。

而椰菜苗波波(trimmed brussels sprouts)就最似青紅蘿蔔湯。

歐防風(parsnip)就有種獨特味道，唔係個個啱口味。

Pet at Home 寵物用品店

萬母屋企冇寵物，亦冇預算將來會有寵物，但小妹仍堅持要行寵物用品店，過吓癮，仲買咗D寵物玩具送畀同學隻貓。

有寵物嘅朋友可以去深入認識吓呢間舖頭。

https://www.petsathome.com/

#萬母英遷

#在英四圍貢

鮮奶燉蛋

萬母好鍾意食甜品，特別係中式甜品，試過放工自己一條友去食碗糖水先返屋企。

嚟到英國，口痕之下唯有試吓自己嚟，從最簡單嘅開始。

1. 雞蛋1隻入加12克砂糖打勻

2. 倒入125毫升鮮奶，攪勻

3. 片走面頭泡泡

4. 用保鮮紙包住，隔水蒸12分鐘

5. 趁熱食

第一次整，都叫合格嘅，起碼食得落口，少少甜，感覺冇咁肥，可能蒸耐咗，邊同底老咗少少。

甜品唔可以當飯食，所以只有pat pat痕時整吓，都係要努力學好煮正餐。

睇屋記(21)

今次呢間係agent主動撩我哋去睇嘅，而我哋又本住參觀吓靚屋嘅心態去。

呢間係2383呎嘅semi-detached house，做盡晒所有extension，連車房都改裝埋。

首先，地下都係典型格局，門口有偏廳，不過偏廳要經廚房入。另外有一個書房，訂造晒書櫃書檯，書房同廚房隔住塊玻璃，阿媽可以一邊煮飯一邊睇仔做功課。個開放式廚房連飯廳超級大，中間有個island外，仲可以放到一大張飯檯。

最amazing嘅地方係個車房改裝嘅utlitiy room，有另一個入口可以直入，放晒洗衣機，乾衣機，boiler，雜物等。

地下呢層都仲未完，近花園仲有間房，可以當偏廳用，更加可以當睡房用，因為佢本身連埋有浴缸嘅套廁。

個花園大而平坦，花園尾又有間summmer house，都係訂造晒櫃。我哋去參觀當日，見到隔離屋花園嘅蘋果樹長滿晒蘋果，仲跌晒入呢間屋嘅花園，成地都係爛蘋果。

講咗咁耐，終於都講完個地下，可以上樓喇。

一樓係典型嘅三房間隔，馬桶同浴室分開，方便大家族。

二樓係一大間套房，連入牆衣櫃。

呢間屋如果計呎價都真係算抵嘅，上手業主本來係大家族一齊住，但因為長輩走咗，所以要賣屋"分家"。

呢間屋嘅裝修算新淨，agent話佢哋2019年剛裝修，而且全屋做晒入牆櫃，D櫃仲係有背板嘅，應該係睇得兼用得嘅。但係如果只係一家四口住，似乎大得太過份喇，只係打掃都已經有排攪。

在英過中秋

每逢佳節倍思親，嚟到老蓮咁遠嘅英國，少咗好多親喺身邊，的確有少少寂寞同少少凍嘅。

英國嘅月餅貴到hihi，貴到唔捨得買，萬母嘅腦海曾經閃過一個念頭，"不如自己整月餅喇"，當然最後理智勝過感情，冇攪穫粥出嚟喇。亦曾經諗過不如買個月餅模，再塞粒雪米磁入去扮冰皮月餅喇，最後都係決定生食雪米磁算喇。

好彩上天都好眷顧萬能家，我哋得到好多愛心月餅，愛心鳳梨酥同愛心無花果。

無論身在世界邊處嘅香港人，萬母都祝大家中秋節快樂，食月餅食到臀臀圓圓。

但願人長久，千里共嬋娟。

#靚過彩虹嘅月餅

#朗媽食在英國

Furniture Village 傢俬店

雖然有排都未搬得屋，但得閒都去睇吓唔同嘅傢俬舖，到時就知道想要嘅應該去邊度買。

呢間Furniture Village入面嘅傢俬都好靚，唔係grand到俗嗰種，而係設計時尚清雅嘅，可惜佢嘅價錢唔多清雅。

https://www.furniturevillage.co.uk/

Woodside Animal Farm

小妹要求去攪動物，唔止睇動物，所以我哋又去Farm喇。今次呢個Woodside Animal Farm又係有得玩有得攪動物嘅。

細嘅動物，例如：雞仔，羊仔，可以任摸，大嘅動物就可以買糧任餵。呢個farm入面都有個室內playroom，有滑梯，波波池，室外另有一個遊樂場，有三輪車，彈床，旋轉木馬，咖啡杯。

一個農場，滿足到兩個願望，而且入場費都唔貴，入到去，除咗買糧，其他玩意都係免費，雖然個場睇落去唔係咁pro，仲雞雞地咁，但小妹都玩咗大半日，所以都幾抵玩。不過萬母就覺得佢適合較細嘅小朋友，小妹呢個年紀已經係上限喇。

https://www.woodsidefarm.co.uk/

大人入場£10，細人£9.5，2歲以下免費。糧£2/包。

離開前必定有farm shop，呢間farm shop除咗有基本野買之外，仲有雞仔同雞蛋，係自己拎返屋企孵小雞嘅雞蛋。小妹極之有興趣養小雞，萬母當然NO NO NO喇，養兩隻怪獸仲唔夠咩？！