第一次參加英國生日會

小妹只係返咗學兩個幾月，已經收到兩次生日會邀請，第一次因為未完全解封，所以我哋婉拒咗。第二次就放小妹去喇。

起初話係喺同學屋企集合，再轉戰公園，後尾因為天氣唔好，就直接留喺室內玩。

當萬母放低小妹時，其實都有D怪念頭，會唔會用生日會做藉口，其實係拐帶兒童㗎？放咗喺人哋屋企，會唔會被綁架㗎？佢自己攪唔攪得掂㗎，會唔會有危險㗎？萬一出意外咁點算呢？直昇機家長係多野諗D，其實小妹唔係"裙腳囡"，個阿媽先係"裙腳媽"。

好彩最後都冇穿冇爛咁返屋企，小妹仲話玩得好開心，佢哋合力扑爛隻pinata，執糖執得好興奮，即場叫麥麥送簡直開正小妹嗰範，英國生日會都興回禮小禮物，又食又拎真係玩到唔願返屋企。感謝同學仔請小妹去生日會，證明佢真係識到朋友仔喇。