終於，終於都見校長喇。因為疫情，與校長嘅約會變為ZOOM meeting，一次仲有幾個新家庭參加，校長先介紹學校，又提醒要多上校網睇，跟住講吓規矩，要準時返學，請假點處理，唔可以曠課等等，又介紹吓學校嘅校服，話去超級市場好易買到，本來學生需要帶運動衫返學校換，但因為疫情，改做體育堂日子著住運動衫返學。校長仲介紹學校嘅午餐係每日新鮮煮，如果係year 2或以下，有政府資助，可以有免費午餐食，但可惜小妹們都超齡了。仲有學校有breakfast club同after school club，可以收費託管學生。
感覺校長都好人性化，例如佢話校服可以著白色polo shirt或恤衫，但就話polo shirt嘅質地對於學生嚟講會舒服D，又話女仔可以著黑色ankle boots，因為冬天著普通返學黑皮鞋可能會凍，校長又show埋對"黑飯魚"運動鞋，話建議可以買呢款，因為夠平，細路嘅腳好快大，好快唔啱著，但亦可以著其他運動鞋返學，又提醒遇著落雪日子，就最好著其他鞋，然後帶"黑飯魚"返學校換，因為著"黑飯魚"行雪地會凍呢。
校長仲話家長送細路返學要戴口罩，老師喺走廊同教員室都會戴，但細路就唔駛，因為英國D專家話細路戴左口罩反而會成日攪塊面，所以唔建議細路戴口罩咁話。
大圍講完，就輪到分家庭傾，校長問左小妹們想人地點稱呼，又問佢地喺香港有冇返過學，最後返學係幾時，英文程度如何，最鍾意咩科目，喺香港嘅學習表現係點。
另外校長又拎住張紙，紙上似乎係印左D哮喘噴霧，問小妹們有冇用開，又問身體情況，有冇特別敏感。再提醒因為學校有小朋友有nuts敏感，所以所有含nuts嘅食物都唔可以帶返學。
校長仲話最近都有幾個香港家庭入學，it's not unusual咁話，萬母相信而家只係開始，將會有更多家庭到步，話唔定遲D學校會有個香港小組都唔出奇。
圖為"黑飯魚"plimsolls，平至£3-4有交易。
沒有留言:
發佈留言