哥本哈根市中心嘅景點並唔係我哋杯茶，除咗趣伏裡公園，Experimentarium 科學館亦係我哋主打景點。
科學館離市中心3個火車站。入場費都唔平，12歲以上已經當大人計，要225 DKK入場費。
科學館內有免費locker可以放低書包同外套，輕便咁去玩。
入面嘅展品全部都係互動，有D似香港科學館，所有嘢都可以落手落腳玩，最好玩係The PULSE Plaza，以隊伍型式玩唔同嘅遊戲，真係大人同細路都覺得好玩，有一part有D似'The floor is lava'，唔准落地，但要㩒息曬牆上嘅燈，另有一part似怪盜神偷，要避開D線由起點到終點。
好難用筆墨去形容呢個科學館，但真係咩年紀都啱玩，最重要係佢唔受天氣限制，又有wifi供應，呢個科學館係少有獲得小妹正面評價的景點，我哋玩到閂館先走。
https://www.experimentarium.dk/
喺哥本哈根市中心，除咗Tivoli Gardens，我哋唯一畀錢入場嘅就係Rundetårn 圓塔，圓塔其實係個古天文台，既然係天文台，要觀天當然要起得高高。
圓塔並唔係建喺山上，所以係一個高塔，佢嘅特別之處係用螺旋坡道上斜，只係去到頂層先有幾級樓梯。
圓塔頂層有個觀景台，可以睇哥本哈根市景。
大人入場60 DKK，細人免費
https://www.rundetaarn.dk/en/front-page/
當初揀去哥本哈根，最重要係想去探訪全世界最古老嘅遊樂場。
可惜Bakken（巴根遊樂園）喺我哋到訪時唔開，所以就只能去全世界第二古老嘅遊樂場，Tivoli Gardens趣伏裡公園，趣伏裡公園交通非常非常方便，喺正哥本哈根中央車站旁邊，一出站就到。
入面有個超過100年歷史嘅木製過山車，最特別之處係要人手操作，每架過山車中間都有一個工作人員值班，負責控制速度。既然去到，點都要試一試，雖然冇180度倒轉個人，但呢個過山車都算刺激。
園入面仲有其他遊樂設施，但就唔算好特別，園區唔算大，所以唔會行到腳仔軟，園區入面有餐廳，出面有food court，如果想暫時離開園區可以請工作人員喺手上蓋印。
我哋由朝早11點開門玩到黃昏天黑齊先走，雖然時不時有雨，但都算滿足咗各人嘅需要。
遊園要收入場費，另外每項機動遊戲都要收錢，亦可以揀買ride pass。
https://www.tivoli.dk/en
繼續暑假遊記，暑假期間，除咗入咗城之外，其實我哋都去咗海邊玩。 Southend-On-Sea(濱海紹森德)雖然係叫south end，但其實佢喺倫敦東面，揸車大約個零鐘可到。係一個海邊旅遊區，有好多arcades同fish & chips店，如果鐘意去冒險樂園嘅大小朋友...
