出人意表的水仙花

前年(2023年)入冬前，萬母買咗3包bulbs，分別係橙色鬱金香，紫色番紅花同黃色水仙花，舊年花謝後，因為懶惰並冇將佢哋挖出嚟，仍然留喺花盤入面，夏天時松鼠時不時走嚟當放題咁食。

今年橙色鬱金香同紫色番紅花都冇曬影，唯獨水仙花竟然復花，真係非常之驚喜。同一個盤之前開完白色番紅花，而家又繼續有水仙花，真係令人發曬花癲。

春天嘅花真係好靚，天父嘅世界真係好奇妙！

#這是天父世界

#發花癲系列

劫後餘生的鬱金香

先旨聲明，D鬱金香係舊年入冬前買嘅，唔係今個月買嘅，唔駛斬手指。

自從前年種過鬱金香，舊年春天見到D花唔駛點打理又開得好靚，食過翻尋味之下，舊年入冬前又買咗包鬱金香，埋咗入盤，靜待佢開花，不過今年D花開得比舊年遲，但遲到好過冇到。

今年係粉紅色系列，唔同品種嘅粉紅色鬱金香，大大細細高高矮矮深深淺淺，唔整齊但各有特色。亂買嘢嘅好處係有驚喜，估唔到鬱金香都可以咁唔同。

點解個標題用"劫後餘生"嚟形容呢？因為呢批鬱金香比採花賊採咗兩朵，又再被晾衫架壓斷四朵，而家見到呢D都係劫後餘生嘅，多謝佢哋仍然努力生存，開花綻放，今年入冬前要繼續種spring bulbs，因為真係好抵種。

#這是天父世界

#發花癲系列

矮得得的串串金

喺英國嘅街頭時不時都見到串串金(Forsythia)嘅，冬未初春時開滿黃色小花，真係幾賞心悅目嘅。

睇咗人哋嘅串串金幾年，終於都忍唔住自己買咗棵，超市bare root盛惠2磅半，真係抵到爛，起初以為起碼要種幾年先會有野睇，點知湊咗返屋企一個月左右就識開花，雖然棵野仲係矮得得，雖然D花皺皺地，但多謝你努力盛放，請繼續加油，期待你長成亭亭玉立，金光閃閃。

萬母今個月收手㗎喇，唔會再買花㗎喇 ~ 再唔忍手就要斬手指㗎喇 ~ 忍 ~

#這是天父世界

清香的風信子

買花真係會買上癮嘅。

喺香港，萬母係臭手，連仙人掌都種得死，但喺英國，就算唔多理佢哋，D花都可以自己生長，實在好神奇，天父嘅世界真係好神奇。

今次嘅發花癲時間，輪到風信子登場，實在忍唔住佢嘅香氣，忍唔住手。

呢盤係今年買嘅，初買返嚟只係矮矮嘅，返屋企兩星期已經狂標高，仲要成個廳都香曬，真係一聞到佢嘅香味就心情靚靚，只係4磅銀心情就靚足2星期，你話係咪抵呢？

搵咗幾間超市，都係覺得黃色最靚，又靚又香，希望你捱得到萬母嘅佛系養花法，出年繼續盛放。

#這是天父世界

Greater Depth的櫻花

春天來了，繼續發花癲。

舊年忍唔住誘惑，喺costco搬咗盤櫻花返屋企，一年後佢冇死，仲繼續開花，如果要出成績表畀小櫻，greater depth佢當之無愧。

謝謝佢開出滿滿嘅粉紅色小花，驅趕冬天嘅悶氣，望住佢真係心情都靚曬，呢棵櫻花買得抵！

#這是天父世界

被番紅花呃咗

根據英國天文台(Met Office)嘅氣象月曆(meteorological calendar)，3月1日已經係春天喇。

春天來了，春天終於都來了！

萬母花園第一個報春嘅係番姓花(Crocus)，之但係，點解有D唔對路嘅呢？買嘅時侯明明係有紫色條紋，點解開出嚟變咗白色嘅，係咪應該要去報消費者委員會，告佢違反商品說明條例呢？睇真D，花心入面真係有少少紫色紋喎~~

Any肥，多謝你哋盛放，話畀我知春天已經來了，雖然天氣都未暖，但起碼有盼望了。

下年要繼續買Crocus，但都係全紫色/黃色驚艷D。

黑池魔術大會

上回講到某人獨自去黑池，點解咁happy呢？咪就係因為去參加一年一度嘅魔術大會囉，三日三夜不停睇魔術，諗起都得人驚，但某人話好enjoy，any肥，開心就好。

https://www.blackpoolmagicconvention.com/