學車記(7) - 仍然"攪不懂"

學咗超過20個鐘車，師傅畀萬母嘅評語係"似懂非懂"，係開得郁架車，但一去到迴旋處或者其他路口就會猶豫不決。萬母都算好學嘅，為咗令自己懂多D，又去睇片學野，下面嘅網站有好幾條學車嘅片，萬母都覺得幾有用，起碼知道幾時應該做咩，當然前提係控制到自己時就有用喇，控制唔到時就講咩都嘥氣。

https://www.how-2-drive.com/driving-lessons/learner-driver-guide/level-1-basic-skills/

https://www.how-2-drive.com/driving-lessons/learner-driver-guide/intermediate-driving-skills/

https://www.how-2-drive.com/driving-lessons/learner-driver-guide/driving-test-manoeuvres/

萬母覺得揸車最難唔係控制架車聽你駛，如果全個世界冇晒其他車，萬母而家都幾有信心自己可以揸好架車，但問題係呢個世界係唔會冇晒其他車，反而係要因應路面情況好快咁作出決定，呢個反應能力真係自知最弱，所以唯有自己諗辦法克服佢，希望好快可以由"攪不懂"進化成"攪得懂"喇。

https://www.youtube.com/watch?v=32JSBHaEsnc

克服他她它 之 Go Ape

萬母身邊嘅朋友不止一次向萬母推薦Go Ape(繩網陣)，但因為小妹有D畏高，所以萬母都係聽咗就算。

點知有次同小妹睇ViuTV嘅克服他她它，小妹竟然話佢想試吓玩繩網，萬母當然即刻去報名喇。

https://goape.co.uk/

Go Ape有幾個唔同程度嘅繩網，分別係：

Treetop Challenge： 10歲以上，最少1.4米高

Treetop Adventure Plus： 6歲以上，最少1.2米高

Treetop Adventure： 4歲以上，最少1米高

以小妹嘅年紀同高度，暫時只適合挑戰Treetop Adventure Plus，每人盛惠£24。

唔同挑戰，唔同年齡，唔同地點，收費都唔同，詳情要去官網睇。

報名時有提醒要戴手套，但到現場見到唔係個個都有戴，但萬母覺得戴住手套玩都有好處嘅，當扯住D繩時可以保護吓雙手，冇咁易磨損。

未上網前，先聽教練講解安全措施同守則，上網後基本上就自己食自己，去到中途先會有工作人員站崗，好彩小妹們都算醒目，每過一關，家姐都等埋阿妹，萬母喺地下觀望，都覺得D細路好勁，差唔多如履平地咁過。

到最後會有zip line瀡返落地，家姐話個zip line最刺激最好玩，阿妹就覺得太高，最後放棄咗zip line，由工作人員帶領行樓梯返地面。雖然冇完成zip line，但萬母覺得小妹已經成功挑戰自己，克服了他她它。

小妹一落地就問萬母，幾時再玩Go Ape，萬母只能推說，等夠1.4米高先喇。

保齡~保齡~ 男女喜愛練球

暑假係要去玩嘅，再一次約埋一班鄰居好友，今次男女練球去。

https://www.hollywoodbowl.co.uk/

用SUMMER2150呢個discount code有早場半價優惠，家庭票(2大2細)2局都只係£26.8，師奶當然要慳住玩喇。

大人細路分開兩條lanes，各自各玩，細路仲有可以用輔助儀器，方便發球。

同場仲有冒險樂園類玩意，又係一燒錢好去處。

可樂雞翼

上回嘅士多啤梨雞翼被嫌棄，今次整個穩陣DD嘅可樂雞翼。

1. 爆香薑片

2. 煎雞翼

3. 取出薑片，加入可樂

4. 醬汁煮滾後，轉中慢火煨熟雞翼

5. 收汁後可上碟

呢隻可樂雞翼，只係聽個名已經令小妹期待，雖然小妹批評D雞翼冇可樂味，但都批准呢味餸繼續喺萬能家嘅飯檯出現。

#愛心雞中翼

Family Fun Fair 嘉年華

喺英國除咗去theme park玩，普通社區公園都時不時有family fun fair，即係咩呢？就好似香港AIA嘉年華咁，有機動遊戲，攤位遊戲咁。

雖然呢D fun fair佔地唔大，但細路們依然玩得開心，所以出街時不妨留意吓D poster，話唔定fun fair隨時玩到去你屋企附近。

10 pounds for 10 tokens，每個ride約3-5個tokens，確係消遣&燒錢好去處。

Matalan 服裝店

萬母起初對Matalan並冇特別好感，不過機緣巧合之下曾經網購過，今次有機會入去實體店。

Matalan主要賣衫，大人細路，男女老少都有，仲有校服，玩具，家品，返工衫同優閒衫都有。

https://www.matalan.co.uk/

其實呢類服務店喺英國並唔係咩特別野，點解萬母都特別介紹佢呢？係因為萬母喺Matalan搵到哈比人褲，哈比人喺英國真係好難買褲，人哋嘅短褲就係三角骨褲，人哋嘅三角骨褲就係四角骨褲，人哋嘅四角骨就係長褲，人哋嘅長褲就可以去拖地。

諗住買童裝可以解決到問題？You're too simple, sometimes naive.衫同鞋都仲可以，褲就真係塞唔落。但竟然，竟然畀萬母喺Matalan發現啱哈比人嘅長褲，仲要10磅有找，真係解決咗幾個月嘅困擾。

就係咁，Matalan成為萬母其中一間最喜歡嘅商店，希望佢繼續為哈比人著想，出多D哈比褲喇。

睇屋記(20)

又八八卦卦去睇屋喇，呢間係1665呎end of terrace house，4房3廁。

地下有一偏廳，再有一開放式廚房同飯廳，仲有一客廁，地下已做rear extension，所以面積都算大。

一樓有2大1細房，另有一浴室，好傳統嘅layout。

二樓已做loft conversion，有主人套房。

由於間屋已做齊extension，所以面積好可觀。

門前有寬闊嘅driveway，花園平坦而寬闊，仲有間garden house。

地點理想，喺受歡迎學校嘅catchment area入面，仲好近大街，購物方便。

咁間屋有咩唔好處呢？第一係佢門前條街比較繁忙，會比較多車聲人聲，第二係間屋本身嘅裝修比較舊，睇佢個天花燈嗰舊野就知好古典，全屋應該要大裝修先得，咁呢條數又要計。