企鵝家族

乖乖企鵝家族，只需每日餵食，陪玩，有詳細指引點養，方便有趣。

又係手痕之作，企鵝家族，最難係要換線，攪到企鵝面歪歪，但總體都算可愛，小妹要求配埋企鵝糧(魚仔一條)，仲親手打埋餵養指引。

睇到呢到，係咪都想養返隻企鵝呢，圖中企鵝已全數送咗畀有緣人喇。

https://www.youtube.com/watch?v=jtH25R-h9uQ&t=1346s

鈎水仙花

喺農曆年前，鈎咗棵桔樹，喺農曆年期間，其實手痕痕都鈎咗水仙花，萬母自己覺得棵水仙都幾靚㗎，但美中不足係個底/盤諗唔掂點整，最後只得個怪怪嘅樽，另外呢棵水仙冇水仙花香囉，水仙花除咗欣賞佢嘅外在美，佢嘅香氣都好重要。

以下係教學短片，睇住逐步鈎，手殘同萬母都做到。

https://www.youtube.com/watch?v=E-71EEIPP0g

返工記 ~ 教師大罷工

英國嘅罷工浪潮一直都未完, 今次仲燒到嚟教育界, 啱啱過去嘅星期三就係教師罷工潮嘅第一波。

英國有好幾個教師工會, 包括: NAHT, NASUWT, NEU, Voice等等, 而今次發起大罷工嘅工會係NEU, 如果英國老師要合法地參與罷工, 首先佢要係NEU會員(或者不屬任何工會嘅自由身); 如果係其他工會會員就唔可以參加今次嘅罷工, 否則校方有權作紀律處分, 當然老師亦可以喺罷工前即刻轉會或一腳踏兩會喇。另一個要注意嘅重點係參與罷工嘅老師係會扣一日糧嘅。

NEU工會建議老師唔需要事先同校方張揚會唔會參與罷工, 只需要當日唔出現就得, 殺學校一個措手不及, 而校方亦唔知道邊位老師係工會會員, 只會知道會員總數。正因為咁, 好多學校喺事前係預計唔到罷工嘅影響, 所以今次都有唔少學校係決定罷工當日閂門, 等學生留家自習。

小妹學校就係其中之一, 當然亦有其他學校係照常開放, 或者只係某d班別停課。而小妹學校就全校關閉, 只開放畀key workers嘅子弟, 仲要事前先同學校申請。

至於萬母嘅學校都選擇咗關門大吉, 但唔參與罷工嘅同事係要照常返工嘅, 仲講明當日要去校務處簽到同簽走, 呢個動作平時係唔駛嘅。校長喺罷工前幾日仲轉登寫咗封"給員工的信", 講明罷工日注意事項, 同埋話罷工當日, 如果仔女嘅學校閂咗門, 老師係可以帶埋仔女去返工嘅。

而罷工當日有同事喺學校門口拉起picket line(警戒線), 鼓勵其他員工參加罷工, 英國法例對於picket line都有好多規限嘅, 例如唔可以多過6個人, 唔可以帶武器等等, 簡單d講就係要和理非喇。

就係咁, 教師罷工就開始咗喇, 以下係其他教師罷工嘅日期。

Wednesday, February 1 (England and Wales)

Tuesday, 14 February (just Wales)

Tuesday, 28 February (Northern, North West, and Humber regions)

Wednesday, 1 March (Midlands, Western and Eastern regions)

Thursday, 2 March (London, South East and South West regions)

Wednesday, 15 March (England and Wales)

Thursday, 16 March (England and Wales)

返工記 ~ Ofsted Inspection

萬母返咗一個學期嘅工，已經遇上十四年難得一見嘅ofsted inspection。

Ofsted Inspection即係類似香港嘅外評視學，相信香港嘅老師唔會陌生。

不過英國呢邊嘅視學，係早一日通知嘅，星期二打電話畀校長，星期三就嚟視學， 一連睇兩日，每日有四個督學嚟觀課，睇文件同埋訪談。

Ofsted inspection主要睇下面幾項：

The quality of education

Behaviour and attitudes

Personal development

Leadership and management

Sixth-form provision

Ofsted評級分為4級，outstanding, good, requires improvement, inadequate

收到電話通知當日，成間學校都好震驚，雖則校長話一早已經準備好，但佢哋都即日開緊急會議，需要被重點視學嘅科頭，更加要加班添。

督學即日已經同管理層開會，但正式結果要一個月後先知。最後揭盅時，萬母學校喺所有項目全得outstanding，佢哋仲因為ofsted inspection得到好成績，專登有日放早嚟慶祝，學生就有pizza食，校長就等放學後請曬全校教職員一齊去食午餐，真係開心到不得了呢。

Ofsted最近都成為新聞熱話，皆因ofsted inspection正進行改革，以往被評為outstanding嘅學校，有好多喺新一輪inspection時被降級，因為以往D學校可以單靠學業成績已經穩取outstanding，而得到outstanding之後可以豁免好多年，所以有D學校單靠食老土已經好多年冇被inspect，但老本都終有食完嘅一日。

去以下網站可以查到每間學校嘅ofsted reports，選校中嘅家長們可以參考一吓。

https://reports.ofsted.gov.uk/

https://www.bbc.co.uk/news/education-63713880

兔年大吉大利

唔經唔覺，數數手指，原來今年係萬能家第三年喺英國過農曆年，由第一年lockdown中傻傻地過，到第二年湊熱鬧去蒸糕bell，今年萬母決定唔再浪費食物喇。

受到家人挑起條筋，決定鈎大吉去，本來打算鈎兩粒吉仔就算，唔知發生咩事，竟然發神經去鈎整盤桔，一邊鈎一邊同小妹講，唔知成唔成功㗎，唔得就拆咗佢整其他野喇。

點知，鈎鈎吓竟然成功咗，今鋪真係大吉大利喇！

萬母係睇呢兩條片學嘅，有興趣嘅朋友都可以試吓。一個週末就攪得掂。

https://www.youtube.com/watch?v=VcFoMMWhyGU

https://www.youtube.com/watch?v=zA3ddj1TO8Q

#兔年大吉

#吐氣揚眉

返工記 ~ 無心工作

放完個聖誕假期，返到公司，萬母收咗份大禮，攪到無心工作。

究竟收咗D咩攪到咁大件事呢？

之唔係一間新office囉。

萬母個職位係今個學年新開嘅，前無古人，所以事前冇人知道究竟實質工作係咩，亦無任何指引去跟，起初阿LM安排咗萬母同社工同事共享一個office，有人照住確係唔錯，有咩唔識唔明都可以問，但因為社工同事時不時都要見學生，仲要傾密計，攪到萬母時不時都要迴避，亦試過兩人同時都要見學生，攪到要去開房(係開課室房門嘅意思)。

所以聖誕假前已經話會裝修office，間多間房仔。本來預計一個聖誕假未必攪得掂，但放完假返去竟然已經裝修好，間房間好咗，仲重新油過曬D牆。

就係咁，萬母有個新office用喇，仲係獨立空間添呀，喺香港返咗咁多年工，從來都冇自己嘅office，嚟到英國竟然又有人生第一次，真係興奮到呢，為咗諗點樣佈置新office攪到萬母成個星期都無心工作，真係有D愧疚添。

#圖文不符

#chibird

https://www.facebook.com/ChibirdArt

玻璃窗吸水機

新年第一post，先嚟個好物分享。

英國嘅屋與水好有緣，但可以話係孽緣。漏水，rising damp，condensation，樣樣都同水有關，今日先講吓condensation(冷凝)。

冷凝即係氣體/液體遇冷凝結，最常見嘅就係汽水罐上嘅水珠。

而喺英國冷凝常見於玻璃窗上，特別係一覺醒嚟，成隻窗濕曬。

因為室外溫度低，室內溫度高，所以就有冷凝，如果室內濕度越高，凝結嘅水珠就越多。

咁冷凝又有咩問題呢？之唔係潮濕發霉囉，窗邊位置積曬水，起曬黑色霉點，真係眼都寃。

如果唔理冷凝，太陽入屋時會蒸發返嘅，但問題係D水份仍然留喺空氣中，空氣濕度只會有增無減，冷凝情況只會越嚟越嚴重。

萬母試過每朝拎毛巾抹窗，但條毛巾抹一間房已經濕曬，就算扭乾都冇咁好吸力，除非不停換乾毛巾。

試過上網爬文，學人放貓砂喺窗邊，但都係冇用。

最後萬能生發現呢隻玻璃窗吸水機，原理同吸塵機差唔多，但就係吸水，而個機頭就似抹窗工具個刮。

呢個玻璃窗吸水機有幾個唔同型號，功能大同小異，主要係運作時間同配件有唔同。

萬能生買咗個5 plus，佢話個窄咀比闊咀靈活，係一個加分位，但如果想平平地，其實買1號仔都夠。

https://www.kaercher.com/uk/home-garden/window-vac.html

除咗用玻璃窗吸水機，用埋抽濕機減少空間入面嘅水份訣效果更佳。

另外，減少喺室內晾衫，煮食，沖涼，呼吸都可以減低室內濕度，但似乎減無可減。