記BA之亂 ~ 第三回 (最終回)

上兩回提到我哋返漁村班BA，起飛後折返倫敦，跟住被安排隔兩日經北京轉機，經過同hotline打咗幾場乒乓波後，結果係經新加報轉機，正當以為所有問題都解決之際，回程班機個status由confirmed變咗not issued，hotline姐姐堅稱冇問題，我哋唯有懷住戰戰兢兢嘅心情，再次出發去機場。 由於我哋係臨時加入，去到機場先check in，好位一早已經被人揀曬，我哋只能分開2組，各自喺middle seat坐十幾個鐘。去到新加坡機場，先坐shuttle轉terminal，又要再過security，結果又係臨上機先check in，其他人一早劃曬位，因為航空公司有policy，小童係會同家長一齊坐，所以就算我哋冇開口要求，空姐都自動波安排孖位畀妹妹同萬母，但見空姐講咗好耐電話，好辛苦先撲到個孖位，真係辛苦佢喇，上機後，萬母旁邊嘅小鮮肉哥哥，樂意同姐姐調位，等我哋三母女可以一齊坐。其實萬母唔介意同小鮮肉哥哥一齊坐㗎，但放返小妹喺身邊會安心D；小鮮肉哥哥，好人一定要一生平安啊！ 由第一次起飛計，用咗48小時，終於由倫敦返到漁村，又係零晨兩點先有機會掂到張床，眼瞓到一個點。 過咗幾日快樂嘅日子，我哋突然醒起回程班機，即上BA網站manage my booking睇睇，好彩見到仍然健在，而且hotline姐姐幫我哋劃嘅位都見到，hotline姐姐冇呃我哋，我哋又開開心心繼續餘下嘅行程。 最後，我哋都順利飛返倫敦，返到屋企，休息咗幾日，就開始同BA claim數喇。同BA claim數唔難，全程只係網上填表，提供埋單據，一日就批出，由於我哋返咗屋企等再飛，變相多咗兩程機場來回，呢兩程車錢，BA實報實銷，照價賠償。 另外先前都有好多網友提到，根據UK261/EU261，每人再有520磅嘅compensation，雖然行程被打亂，但往好處諗，有compensation幫補吓張貴貴機票都唔壞得曬嘅。 想了解更多EU261，請睇以下連結，知道多D自己嘅權益。 https://www.heyavo.com/blog/eu261-2004-eu-flights-claim 同樣被BA所亂嘅，去BA網站就可以索償。 https://www.britishairways.com/en-gb/information/help-and-contacts/complaints-and-claims BA之亂去到第三回，終於都告一段落喇，可以回復平靜喇。

記BA之亂 ~ 第二回

上回講到BA班機起飛無耐要原機折返倫敦，萬能家要返屋企等候發落，詳見 記BA之亂~第一回。

有好多網友留言，有同一班機嘅天涯淪落人，亦有其他分享搭BA匪夷所思嘅經驗，似乎BA真係好落力畀大家經歷更多。

講返我哋今次BA之亂，遊完機河，返到屋企已經零晨兩點，臨瞓前都未收到BA通知後續安排，朝早六點萬母起身去check email，發現BA已經為我哋重新book位，仲好貼心咁安排星期日(我哋原本星期五晚飛)中午坐Air China先去北京，再轉CX返漁村。

為咗感謝BA咁貼心嘅安排，我哋嗱嗱臨打去hotline，表達感激之餘，仲詢問吓有冇其他選擇，傾咗一輪，終於都安排到喺星期六晚先搭澳洲航空去新加坡，再喺新加坡坐CX返漁村，咁樣轉其實喺飛機上嘅時間係多咗嘅，但就可以避開某D人/物/地。

正當以為有機位就一天都光曬時，我哋嘗試劃埋位，但BA職員話呢件事唔係佢跟開，叫我哋自己搵澳洲航空，但澳洲航空網站表示冇得online check-in，要到機場先有得check in，我哋又打去澳洲航空hotline問，點知唔問由自可，一問就出事喇，澳洲航空話我哋嘅機位係not issued，叫我哋搵返BA，要BA confirm咗機位先得。

就係咁，我哋又打去BA hotline，hotline職員好好，只係要我哋等咗幾分鐘就confirmed喇，跟手又再搵返

澳洲航空，但始終都係劃唔到位，要到機場先攪到。

睇到呢到係咪都覺得頭暈暈呢，又BA hotline又澳洲航空 hotline，我哋就好似人球咁被人踢嚟踢去。

事情去到呢步都未完結，因為我哋第二程機係CX，我哋嘗試去埋CX網站劃位，點知就見到一個異象，我哋一開始見到回程倫敦班機個status係confirmed，但當攪完一大輪，攪掂澳洲航空程機後，回程嘅機位就由confirmed變咗not issued喇。

呢吓我哋真係驚喇，唔係攪掂一程就攪亂第二程嘛，之但係，以英國人嘅做事方式，的確真係可以咁㗎喎，改啱A就整錯B，改好B就輪到C錯，改埋C就攪錯返A，so british!

結果我哋又要再次打去BA hotline，問清楚佢回程班機究竟係confirmed未，BA hotline個姐姐言之鑿鑿話回程機位冇問題，仲話我哋好去睇CX嘅資料，佢哋係BA唔係CX，傾咗一大輪，最後姐姐都好好人，為咗令我哋放心，佢幫我哋劃埋位，留埋全名畀我哋，但其實我哋都唔係好安心，因為英國人做嘢真係可以出錯㗎，但去到呢刻我哋都已經無能為力，唯有信喇。

第二回都寫咗咁長，第三回待續。

記BA之亂 ~ 第一回

呢次BA之亂其實係發生喺7月尾，隔咗成個月，飲飽食醉玩夠，先記錄。

今年暑假萬能家揀咗坐BA返漁村，點知貴人出門遇奧運，撞正奧運開幕，未起飛已delay，因為巴黎上空有管制，要排隊起飛。

起飛無耐，突然又有宣佈，話廁所無水，已安排樽裝水洗手，行程會繼續，well，已經肉隨砧板上，唯有盡量少去廁所喇。

隔咗一陣，又再有宣佈，因為technical issues，需要原機折返，由於已經飛咗個幾鐘，所以回程都要飛個幾鐘，喺回程時空姐會派埋餐，等大家食飽飽先再算。

機上嘅人異常冷靜，瞓覺嘅繼續瞓覺，睇戲嘅繼續睇戲，到臨落機前，機師都話唔知會點安排，叫大家留意閘口地勤嘅指示。

一落機，已有一班地勤招呼大家，每人先派£10餐券。需要酒店嘅亦有安排，地勤姐姐話酒店房唔夠成機人，所以勸籲可以返屋企就唔好住酒店，佢仲話第二朝中午前都唔會有機走，所以我哋就揀咗返屋企先。

行咗個大運，運咗個吉，是次得著係食咗個飛機餐同睇咗兩套戲。

返到屋企已經零晨兩點，嗱嗱臨去瞓，第二朝再睇吓BA點補鑊。

待續~

Westonbirt Arboretum @ Tetbury

為咗唔好令小妹成日對住電腦，要想辦法令佢哋喺戶外消磨時間。

當初睇中呢個arboretum(植物園)，係因為佢個樹頂步道(Treetop Walkway)，之後再睇發現佢有好多唔同嘅trail(家樂徑)適合唔同需要，仲有適合一家大細嘅Gruffalo Trail，長約1英里，拖男帶女嘅話約行1個鐘頭左右。但小妹嫌齋行太悶，決定玩orienteering，咁樣就可以幫小妹消磨一個下晝。

其實呢度真係可以用鳥語花香嚟形容，帶埋食物嘅話，行吓野餐吓，行足一日都行唔完。

呢個Forestry England係全國周圍都有好多唔同嘅森林植物園，好多都有Gruffalo Trail，適合誘導D細路出外走走。

https://www.forestryengland.uk/westonbirt-the-national-arboretum

大人入場£12

細路入場£4

Castle Combe @ Chippenham

Castle Combe被譽為英格蘭最靚村莊。離Bath只係半個鐘車程。

Castle解城堡，Combe解山谷，Castle Combe解山谷中嘅城堡，但城堡已經搵唔番，只留低一條小村莊。呢條村莊自從1600年代開始，都冇新嘅建築，所以好古色古香，亦成為英國古裝片嘅取景地。

呢條小村莊真係好小，主要係有3個景點，1) The Market Cross(十字市集)，據說呢個市集由14世紀開始已經每個星期有市集，2) St. Andrew's Church，可以免費參觀，3) Bybrook小溪上嘅橋，好多遊客停喺度影相，呢條小村莊真係唔大，30分鐘就已經行得曬，但如果要慢慢睇慢慢影，當然可以影好耐喇。

村莊入面仍然有居民住，所以官網都提大家，要尊重居民私穩，唔好喺玻璃窗睇人咃屋企，亦唔可以用航拍機，小村入面都有酒店，亦有cafe。

有一間好得意嘅小店喺The Market Cross附近，門口擺咗D蛋糕，採取自助形式，要買就自己將錢放入信箱。

另有一間The Little Picnic Shop，可以預訂野餐盒，每個餐盒£20，內容好豐富，我哋訂咗2個，一家四口食飽仲有剩。

Castle Combe半日遊就已經夠，附近有賽車場，有賽車嘅日子可以去睇賽車，其他日子亦有體驗可以玩，不過小妹話唔鍾意賽車，所以我哋就冇入去喇。

The Little Picnic Shop - Takeaway Only

https://www.facebook.com/littlepicnicshop

Castle Combe介紹

https://sites.google.com/site/castlecombewiltshire/

Castle Circuit 賽車場

https://castlecombecircuit.co.uk/