好物分享 ~ 遙控插蘇

又嚟好物分享，呢個插頭表面係一個普通插蘇，但實質佢係一個遙控插蘇。

將呢個插蘇插喺牆上嘅插頭，再接駁電器，就可以利用手機嘅APPS去遙控。

咁講吓我哋點利用呢個插蘇先，通常我哋都係去旅行時用嘅。

我哋會將盞座地燈接駁去遙控插蘇，再將盞燈放近窗邊，跟住用APPS控制佢嘅開閂時間。

個APPS可以接受預設時間，我哋會預設喺天黑前開燈，再喺平時嘅就寢時間閂燈。

咁樣間屋就唔會幾日都黑媽媽，惹人留意喇。

小貼士： 開閂時間set得零丁一D，例如set 8:07而唔係8:00。

萬一唔記得預設，用手機都可以即時遙控㗎。

呢個插蘇B&Q有售，當然其他地方都仲有好多類似產品喇.

https://www.diy.com/departments/tcp-smart-plug-240v/8719638018821_BQ.prd

#萬母英遷

#在英四圍貢

#英遷生活點滴

Blue Peter Badge 藍彼得盾

一開波要講清楚先！

呢個唔係傷健人士嗰種Blue Badge！

呢個唔係傷健人士嗰種Blue Badge！

呢個唔係傷健人士嗰種Blue Badge！

呢個Blue Peter Badge係畀6-15歲嘅細路嘅。

Blue Peter係一個英國兒童電視節目，類似香港嘅閃電傳真機，放學ICU咁，而且佢仲係全世畀最長壽嘅兒童節目，1958年首播到而家都仲播緊，逢星期五5點喺CBBC有得睇，星期六日會重播。

咁Blue Peter Badge係畀Blue Peter觀眾嘅獎項，例如喺節目亮相或者有貢獻。Blue Peter Badge嘅持有人，喺有付費大人嘅陪伴下，可以喺全英國超過200個景點免費入場，免費景點清單如下：

https://www.bbc.co.uk/cbbc/attractions

呢個Blue Peter Badge係免費申請嘅，申請程序好簡單，用最基本嘅Blue Badge做例子(佢本身分好多唔同顏色/才藝嘅badge，隻隻要求唔到，詳見以下連結：)

https://www.bbc.co.uk/cbbc/joinin/about-blue-peter-badges

想申請Blue Peter Badge，只需要寫封有趣嘅信/故事/詩/食譜，或者畫幅畫，再連埋個人資料寄去Blue Peter，之後等12個星期就會收到個藍彼得盾心口針，收到之後，再申請埋個Blue Peter Badge ID card就得，之後帶住個ID card同個盾仔就可以免費入指定景點喇。

有興趣就去下面官網睇清楚要求喇，有咗呢個Blue Peter Badge，同細路出街玩就可以慳DD喇。

https://www.bbc.co.uk/cbbc/findoutmore/blue-peter-apply-for-a-blue-badge

Family Gaming Night @ Centre for Computing History (Cambridge)

 一直都知道cambridge有間centre for computing history，但一直都未有足夠動力去。

見佢有Family Gaming Night，仲要係Japan Edition，當然要去趁吓墟。

個centre比較山寨feel，地方唔係好大，但入面擺咗好多古董電腦，如果對電腦歷史有興趣嘅，值得一去。

除咗古董電腦，仲有古董手提電話，同古董遊戲機，今次仲要係made in japan edition，仲更有熟悉咁。

講返個family gaming night，其實係開放個場畀人打機，入面所有開咗嘅機都可以打，有大大部嘅街機，有童年回憶嘅灰機，仲有game boy，都係一個幾過癮嘅體驗嚟嘅。

https://www.computinghistory.org.uk/

尋bluebells @ Gobions Wood (Potters Bar)

英國嘅春天真係真係好靚，生機勃勃。 趁天氣好，又去發花癲，今次去尋bluebells(藍鈴花/風信子)。 英國出產嘅風信子佔咗全球產量嘅一半，佢喺其他地方好罕見，但英國春天就周街都有，風信子嘅花期係4-5月。 但風信子原來都分本土(English bluebells)同非本土(Spanish bluebells)，佢哋外型雖然相似，但其實都有分別嘅，英國風信子有香味，葉片幼D，花深色D，最重要係有彎嘅花莖，想知詳情，可以去下面網站。

https://www.nationaltrust.org.uk/discover/nature/trees-plants/a-guide-to-bluebells-in-the-uk

由於英國風信子已經被西班牙風信子入侵生殖地，而且西班牙風信子更易傳播，同埋佢會同英國風信子混種，攪到英國風信子越嚟越少，成為受保護物種，喺英國摘/破壞風信子係犯法嘅，所以大家用眼欣賞好喇。

講返今次去嘅Gobions Wood，佢係一個woodland(林地)，所以地下好muddy，但風信子就係鍾意生長喺呢D地方，要去探佢唯有犧牲對鞋。呢個Gobions Wood有個大草地，有個小小嘅兒童遊樂場，仲有個漁塘(釣魚要申請)，行入去wood，個感覺好似入咗香港嘅郊野公園咁，非常舒服，小妹建議下次帶埋食物去聽住雀聲野餐。 慢慢行，慢慢睇，慢慢聽，跟住就會發現個地下好似鋪咗紫色地毯咁，成地都係bluebells，呢個地方真係好舒服，而且行得唔算辛苦，我哋見到好多一家大細，同埋狗狗去郊野樂行。 https://www.hertswildlifetrust.org.uk/nature-reserves/gobions-wood 除咗風信子，我哋仲見到鵝子一家七口，鵝BB毛茸茸，好cute。 親親完大自然之後，我哋去咗車程15分鐘以外嘅outlet(The Galleria)行街，呢個outlet嘅中亭有個收費嘅室內遊樂場，畀人泊低D細路去盡情shopping。 https://thegalleria.co.uk/ #這是天父世界 #發花癲系列