搬屋篇(1)-改地址

因為我哋裝修期都比較長，有長時間揸住兩間屋嘅鎖匙，所以我哋有一段頗長嘅時間可以慢慢改地址。

以下係綜合咗網上資料再加咗D自己諗到嘅資料。

需要改地址嘅機構/地方：

1. 銀行 (好簡單，上網/用apps就改到)

2. DVLA 車牌 (https://www.gov.uk/change-address-driving-licence)

3. DVLA 車log book (https://www.gov.uk/change-address-v5c)

4. 車保險

5. 屋企保險

6. 手提電話

7. 水公司 (需要通知公司停用 或 轉供應地址)

8. 電公司 (需要通知公司停用 或 轉供應地址)

9. 寬頻 (需要通知公司停用 或 轉供應地址)

10. 選民登記 (https://www.gov.uk/register-to-vote)

11. Home office (https://visa-address-update.service.gov.uk/)

12. NI (https://www.gov.uk/tell-hmrc-change-address)

13. TV License (https://www.tvlicensing.co.uk/cs/update/multiple-changes/index.app)

14. NHS (呢個要喺GP度一次過改，我哋GP係要帶埋地址證明親身去改嘅)

15. Nectar card/ clubcard 呢類會員卡

16. Amazon / ebay 嘅送貨地址

改地址呢家野真係可以掛萬漏一嘅，所以我哋喺搬之前2個月已經開始逐少逐少改，見到屋企收到信又即刻改做新地址，希望呢個list夠詳盡，可以幫忙住搬屋嘅人減少一D煩惱。

#圖文不符

#春天來了

#這是天父世界

#木蘭花

#櫻花

裝修記(19) - 揀傢俬

去到裝修嘅尾聲，開始要諗傢俬喇，傢俬真係有平有貴，家家要求唔同。

萬能家就行大眾化路線，所以多數幫襯下面呢D舖頭。

https://www.ikea.com/gb/en/

https://www.therange.co.uk/

https://www.dunelm.com/

https://www.wayfair.com/

雖然英國屋比香港屋大，但想要有足夠儲物空間，又唔想要大壓迫感，所以喺扑槌都要諗清楚，計清楚。萬能生就用咗以下呢個網頁去模擬屋企擺咗傢俬係咩樣，繼而決定衣櫃買幾闊。

https://www.floorplanner.com/

呢個網站都算易用，而且免費，除咗2D圖，仲有3D圖睇，個模擬圖同現實有8-9成相似，所以都幾好用，可以方便未有實物前，想像一下間房會變成點。

不過，千計萬計都有計漏數嘅時候，我哋計好咗個廳放得落張長梳化，但就計漏咗入屋再轉入廳嗰個位，結果張梳化係入到大門，但就轉唔到入廳。

望住張梳化塞住個hallway，我哋煩惱完一輪之後，決定張梳化要由後門入花園，再經花園入屋，但呢個壯舉需要幾個壯士先完成到。喺呢個moment，萬母同萬能生講咗以下嘅說話：

"你估張梳化要幾多個人先抬得起？你出聲講要幾多個男人，我有辦法call返嚟。"

講完嗰一刻，萬母都覺得呢句說話怪怪地，點解好似講到自己有好多男人咁呢？？！！

最後萬母碌咗友情卡，問朋友借咗兩個老公返嚟，三個男人夾手夾腳將張梳化搬入屋。

不過個故事未完嘅，張梳化入屋後發現有damage，需要換貨，即係呢張梳化要經後門出返去，新梳化又用同一途徑入屋，不過今次我哋學精咗喇，我哋要求搬運工人幫手搬，佢哋真係專業壯男，三兩吓手勢已經攪掂。

除咗梳化，其實好多大型傢俬(例如：衣櫃，床)都需要兩個人一齊搬上樓，所以喺搬屋嘅過程中，真係欠落好多人情債，需要慢慢還。

雖然好多野要攪，好多野要學，但總算到尾聲，搬屋有期喇！Yeah!

見工記

湊住兩隻小妹，本來萬母都冇諗住返工，但日日喺屋企又好多無咩意義咁，所以就試吓搵D兼職做吓。

見到有學校請監考員，萬母就即管試一試。

寄出求職email 4日後就收到回音，有得見工。

因為好多年冇見工，所以萬母都專登準備咗一吓，主要都係準備吓用英文做自我介紹，同埋解釋點解嚟英國生活。

見工嗰日，先被帶去參觀校園，跟住再同兩個interviewer面談，佢哋真係有問點解要嚟英國生活，萬母都簡單解釋咗香港而家嘅情況，佢哋都表示明白，仲話而家明白點解最近多咗咁多香港學生入學。

可能萬母都叫做有相關經驗，所以面試過程都叫順利，面談完佢哋叫萬母都坐一陣就已經當場話出offer。

見完工之後要做嘅就係簽約(寄去屋企)。

因為要對細路，所以要做enhanced DBS check，由公司幫忙申請，萬母只係上網填表，交埋身份證明文件就得。

雖然只係做散工，但都要做reference check，萬母嘅諮詢人喺一個星期後就收到email要幫萬母做reference。

就係咁，萬母喺英國嘅第一個interview總算順利完成，感恩。

PS1: 學校通常會喺1月底至2月出廣告請監考員，有興趣嘅可以去 https://uk.indeed.com/ search "exam invigilator"

PS2: 監考員無需相關工作經驗，會有相關培訓提供。

PS3: 監考員喺考試季節先有得開工，上午班要返8點機，下午班放3點幾，會撞細路返放學時間。

裝修篇(18)-揀窗簾

窗簾呢家野，起初以為好簡單，點知原來又有野學。

首先，原來間屋個窗係bay window，中文叫吊窗或凸窗，亦即係凸出墙外的窗，咁bay window又點呢？因為隻窗唔係一排直嘅，有轉彎位，所以條窗簾軌/棍就要識轉彎喇，其實呢D bay window嘅curtain track/pole係有得賣嘅，B&Q，Dunelm，Amazon都有，但問題係，我哋冇信心自己裝到，因為隻隻窗嘅彎度唔同，所以最後都係要畀錢人賺。

裝好窗簾軌之後就輪到上窗簾喇，因為以往喺香港用開窗簾棍，簡簡單單買條有eyelet窿嘅窗簾已經攪得掂，但而家用咗窗簾軌，就要用pencil pleat窗簾，跟住又要配埋gliders同hooks先掛得，總之又係幾廿歲人先再學新野，仲要上網學點掛條窗簾。

https://www.dunelm.com/info/buying-guides/how-to-hang-curtains

因為pat pat痕，想掛公仔窗簾，但公仔窗簾好少有遮光，結果又要再買blackout lining掛喺窗簾後面，圖中就見到有blackout同冇blackout嘅相比。

終於，終於都掛好D窗簾喇，但發現對街嗰邊，如果打開窗簾就會被人直望入屋，拉埋窗簾又會黑蚊蚊，結果，又要掛多層紗窗簾，好彩得builder教路，紗窗簾夠輕，只需要用net curtain wire就夠，我哋買料返嚟，佢仲幫我哋上埋添。

net curtain wire

https://www.dunelm.com/product/net-curtain-wire-1000010223?defaultSkuId=20218744

不過呢層薄薄嘅紗窗簾真係好神奇，日頭時間，喺屋入面係可以望清楚街外，但喺街外真係望唔到入屋，萬母試過好似變態婆咁，喺屋出面"烘"埋玻璃度望，都竟然睇唔到屋入面，所以呢，為保私隱，紗窗簾真係值得裝。但要留意，天黑後，紗窗簾就保唔到私隱㗎喇。

一間房嘅bay window因為好闊，需要用4塊窗簾先夠，4塊窗簾+4塊blackout+4塊紗窗簾，真係諗起都覺得痴線。

Pancake Day

Pancake Day又名Shrove Tuesday(懺悔星期二)，係Ash Wednesday(聖灰星期三)嘅前一日。

Ash Wednesday即係大齋期(Lent)嘅第一日，亦係復活節前嘅40日，因為復活節年年都唔同，所以Ash Wednesday同Pancake Day都係年年唔同日子。

好明顯呢個節期係同基督教有關係嘅，傳統教會會有塗灰禮，或者禁食守齋，現代教會就會鼓勵人喺呢40日禁戒一D野，例如唔食某種食物，唔做某項活動等等，以表示悔改。

咁同pancake又有咩關係呢？

因為以前嘅基督徒要守齋，期間唔可以食含奶蛋嘅食物，所以佢哋就喺大齋期前一日，食晒呢D野佢喇，咁要食晒D奶同蛋，就揀咗整pancake喇。

Pancake day當然要趁吓熱鬧食pancake喇。