茫茫校海點搵啫

應承左老友分享萬母點揀學校，所以黎緊都有一系列講學校嘅post，但全部只屬個人意見，未必人人啱用。

英國咁多學校，點揀好？逐間逐間睇，睇到少主變阿婆阿公都未睇得完喇。

雖然跟隨羊群有人會話好蠢好傻，但萬母相信咁多人揀必定有輘輷(景轟)嘅，所以除左睇compare school之外，萬母都會上council網站睇吓過往幾年嘅派位結果，搵吓邊D係區內嘅受歡迎學校。

Council(起碼萬母住呢區嘅係)年年都好透明咁列晒上年嘅派位數據，當中會列明每間學校有幾多學位(places available)，收到幾多個申請(no. of on-time applications)，每個criteria收左幾多個學生，如果係計住址嘅，最遠收到幾遠(furthest distance offered)。隔離區council甚至列埋每間學校收左幾多個係1st preference，幾多個2nd preference，......透明到不得了。

咁睇住呢D數據，就可以知道區內邊幾間學校最受歡迎。先旨聲明，受歡迎並不等於最好/最合適，只係受當地人歡迎嘅學校實有佢吸引之處，當初嚟報到，老鼠拉龜，唔知點入手時，唯有從受歡迎開始入手去了解。

附圖係節錄左嘅council數據，左4欄係原本有嘅，最右一欄係萬母加嘅，將no. of on-time applications除以places available，就知道"超額認報率"，當然呢個率並非絕對準確嘅，因為on-time applications冇講明間學校係被放第一位定第六位，但點都有少少參考價值嘅，起碼佢會被放入preference list先。

睇番個附圖，好明顯A校同C校比較受歡迎少少，特別係A校，"認報率"又高，catchment area又細(要住到0.598 miles內先入到)。

論受歡迎程度，B校同D校就一般般喇，D校雖然"認報率"比B校高，但佢嘅catchment area超大，超過11 miles，估計就算唔報，最後都有機會派到。

咁睇完D數據之後，如果冇時間去認識所有學校嘅話(其實一個區咁大，肯定冇可能睇晒咁多學校)，就應該重點認識A校同C校，一個區揀4-5間精選去了解都已經夠花時間，去吓學校網頁咪吓書，又去吓compare school睇吓數據同報告。

家家有求，大家口味各有不同，可能一click入學校網頁就覺得好唔user friendly, 睇得好唔開心，而唔喜歡間學校，亦可能見到D校服好娘，就唔想報，人哋覺得好嘅又未必啱自己，所以書僮們點都要親力親為，以上方法只係分享返拉龜嘅入手位，並唔代表咁樣可以搵到最合適嘅學校，始終都要靠自己去了解同感受。

書僮們，齊加油，共勉之！

以上資訊係由萬書僮上網爬文所得，如有錯漏，歡迎書僮們一齊研究討論。

敬畏耶和華是智慧的開端，認識至聖者便是聰明。(箴言 9:10)

落大雨，水浸街，阿媽擔泥上街賣

本來想繼續講學校，但facebook某local group係咁彈水浸相，咁萬母又上gov.uk睇喇，發現真係水浸。

其實上星期打風落雨時，天氣報告已經報過有水浸。

未到英國之前都曾經聽講過某D地區係會水浸嘅，如果揀落腳點甚至買屋時要特別留意清楚，否則買左間時不時送泳池嘅屋就麻煩喇。

下面網站只要輸入postcode就可以check到該地區有幾大水浸危機， 包括：

Surface water - 即因為大雨疏流唔切而水浸

Rivers and the sea - 因為海水或河水而水浸

https://flood-warning-information.service.gov.uk/long-term-flood-risk/postcode

下面條link唔駛入postcode，直接睇地圖。

https://flood-warning-information.service.gov.uk/long-term-flood-risk/map

下面呢個輸入postcode後，可以見到個地圖，顯示附近地區有冇水浸危機。

https://flood-map-for-planning.service.gov.uk/

另類體育堂

National lockdown，學校停課，轉做網課，但雖然係上緊網課，小妹們每星期都有最少一節體育堂，好多時老師都係俾條youtube link佢地，叫佢地自己跟住做yoga或是跳舞。

呢個星期，老師係俾左條just dance嘅youtube link，小妹見到就話，睇youtube跟住跳都冇得評分，倒不如直接開switch跳喇，就係咁，另類體育堂誕生了。

小妹們不單自己上體育堂，仲邀請埋幾十年冇上體育堂嘅萬母一齊跳，萬母一邊跳一邊聽到tic tic tac tac嘅骨頭聲，唔知仲以為自己跳緊tic tack舞，真係好驚跳到D骨頭散晒落地。

萬母諗住走精面，企喺旁邊扮跳舞就得，點知被小妹發現，小妹決定讓出個joy con，睇吓萬母拎到幾分，萬母又諗拎住joy con郁吓隻手咪得囉，點知又被小妹見到，訓斥話要郁埋個頭，個pat同對腳，之但係，得一個腦，頂多分埋左右兩邊，左腦控制得隻右手又控制唔到隻腳，右腦郁得隻腳黎又控制唔同個頭，全個身都好似不受控咁亂郁，連面部表現都不受控，萬母諗住靜靜雞行後少少，咁揸流灘時就冇咁易被發現喇，點知有人一邊跳舞，一邊監視，唉......幾時先復課？可以正常上體育堂呀？老人家D骨頭唔頂得好耐架咋。

其實都應該感恩小妹們仲肯參萬母玩，過多幾年可能佢地連睬都唔睬我，同埋，好彩個窗唔係對住鄰居屋企，否則以後要戴頭套先出得街見人。

唉，冇咩事，萬母都係返出去練舞先喇。

升中派位機制(倫敦限定)

作為一個港產嘅專業書僮，少不免係目標為本嘅，咁最近嘅目標係咩呢？之唔係升中學囉。玩遊戲要先了解遊戲規則，咁萬母當然要去睇吓中學派位點玩喇。

今次個頭盔要早D戴定，因為萬母只係睇自己區嘅council資料，而區區可能都唔同嘅，以萬母理解All London boroughs係同一機制，其他區就真係唔知喇，所以住其他區嘅真係要自己上council網站睇清楚。

~~~以下資訊係倫敦限定~~~

升中派位喺10月底截止，即係讀Year 6(小學最後一年)嘅開學初期就要準備好喇，派位結果係第二年3月初公佈。

咁點玩呢？喺香港係睇成績，分band1/2/3，再揀最多30間中學。喺倫敦主要係睇住址，最多揀6間中學，除左自己嗰區，隔離區都揀得嘅。

Council網站同學校網站都會講明每間學校嘅收生要求。甚至好透明地講埋舊年嘅學位分配係點，舊年住幾近先入到。

有D Grammar School，係要睇成績嘅，學生係要考一個叫11+嘅考試，用呢個成績去報Grammar School，甚至independent school(私校)。11+除左考英文同數學，仲會考推理，由於個11+係Year 6學期初就要考，如果要準備就要由Year 4開始操卷，甚至上補習班，萬母曾經一刻都心郁郁諗需唔需要去考11+，報Grammar School，但同萬能生傾過之後，都係覺得黎到英國就唔好跟返香港讀書嗰套，應該輕鬆少少，俾多D空間去發展。BTW，有D Grammar School除左睇11+成績外，仲會睇住址嘅，所以有興趣嘅就要留意埋喇。

咁唔睇成績嘅學校又點玩呢？其實都有好多花款，最普遍係"looked after children"(即被收養嘅兒童或住兒童之家嗰D)會優先取錄, 其次係學校職員嘅仔女同在學學生嘅細佬妹(係咪覺得同香港升小學好似呢？)，如果係一條龍學校(有中小學嗰D)又會收番自己嘅小學畢業生先，某D中學又會有聯繫小學，會撥特定嘅學位去收呢D小學嘅畢業生，有宗教嘅又會分宗教隊，有D又會特別有幾個位俾特別才能嘅學生(例如：Music, Art)，最後先係睇住址遠近。

所以，揀好心儀學校之後, 真係要上學校網站去讀熟佢嘅收生準則，咁樣先大D把握去玩呢個派位遊戲。有D學校甚至講明遠近係點計，例如由學生屋企門口拉直線去學校某個閘口，所以有心嘅真係要睇清楚。

知道要鬥住得近都未夠，仲要睇吓佢點派嗰6個志願，以香港為例，係派晒第一志願先處理第二志願，即係第二志願不能揀太熱門嘅學校，咁倫敦呢邊又點呢？Council其實有講嘅，佢會將你細路嘅名交俾你所列嗰(最多)6間學校，學校就用佢嘅準則去排次序，有機會如果真係咁好彩嘅話，6間都會收你個細路，但個細路冇可能切開六舊去返6間學校，所以最後council係會跟你排嘅preference去派學位俾你。

一講到鬥住址，實有人會動歪念，買個假地址，或者短期租一個咪得囉，sorry，你精佢都唔笨，council都講明，要提供住址證明，包括最近3個月嘅水電煤單，如果係賣樓再買樓的話，係要交出兩間屋完成買賣嘅證據同新屋嘅水電煤單，買左新屋裝緊修未入住都唔可以拎黎報學校架，如果係由一間租屋搬去另一間租屋，一樣要交齊證據證明真係搬左，例如舊屋已停水電煤，新屋嘅水電煤單等，千祈唔好諗住有得呃人，the big council is watching you ga.

所以結論係，如果有細路需要派位嘅，好好諗清楚要住邊，如果能夠搵到一個住址，剛剛好喺幾間心儀學校嘅catchment areas入面，咁就呵呵呵囉，咁當然喇，英國咁大地方，唔似香港咁有學校邨，D學校好少喺埋一堆，能夠搵到"叫雙飛"嘅住址已經好難得。

以上資訊係由萬書僮上網爬文所得，如有錯漏，歡迎書僮們一齊研究討論。

#圖文不符

#圖片應命名為"窗外"嗎？

英國國定課程(National curriculum)

作為一個專業嘅伴讀書僮，為左少主嘅福祉，點都要花D心機理解吓個課程。

英國有個National curriculum，有D網站譯作國民教育課程，萬母覺得咁譯實在有D敏感，其他網站譯作國定課程會比較合適D，即係國家教育部指定嘅課程，學校要跟住黎教嘅(但其實某類學校係可以有彈性嘅，同香港嘅直資學校一樣)。 呢個國定課程係分4個階段，小學兩階段，中學兩階段。 Key Stage 1 (Year 1-2，即小一同小二) Key Stage 2 (Year 3-6， 即小三至小六) Key Stage 3 (Year 7-9， 即中一至中三) Key Stage 4 (Year 10-11, 即中四至中五) 由於Key Stage 5 (Year 12-13, 即中六至中七)係optional, 所以就冇喺國定課程入面。 咁個國定課程要求學校教咩呢？首先有必修課程(core subjects)，英文, 數學&科學。 另外仲有基礎課程(foundation subjects)，唔同key stage有唔同要求。 例如：中學要讀citizenship(公民教育), 高小同初中要學languages，所以小妹們要學西班牙文，有D學校就學法文。另外仲有宗教同性教育係學校必須提供。 - 美術與設計 - 公民教育 - 電腦操作 - 設計與科技 - 語言 - 地理 - 歷史 - 音樂 - 體育 - 宗教 - 性教育 每科都有好詳細嘅課程指引，當然萬母未有咁好心機科科睇晒喇。但起碼知道網上資源係呢度，需要時可以去睇。 https://www.gov.uk/government/collections/national-curriculum 有國定課程，當然亦有國定評估(類似香港嘅TSA咁，全國都考同一份卷)。 Year 1有個Phonics screening check Year 2有英文, 數學&科學嘅national tests Year 6(小學畢業)亦有national tests Year 10/11(中學畢業)有GCSE National test嘅past papers喺網上有得睇，萬母先前都專登睇過Key Stage 1嘅national test，了解吓有咩內容係小妹skip左(即係喺香港未學，到英國又已教嘅)。有興趣嘅書僮都可以去望望。 https://www.gov.uk/government/collections/national-curriculum-assessments-practice-materials 另外都有網上書店賣補充教材，萬母曾經一刻都心郁郁想買嚟俾小妹進補吓，但最後都係剎停左，無理由喺香港堅持唔買補充，嚟到英國先走去買架嘛，冷靜D，冷靜D~ Waterstones https://www.waterstones.com/category/childrens-teenage/education The Works https://www.theworks.co.uk/c/books/childrens-books/primary-school-books 以上資訊係由萬書僮上網爬文所得，如有錯漏，歡迎書僮們一齊研究討論。 圖為雪景中嘅朝霞。

闔家齊學數大餅

小妹呢兩個星期嘅數學課程係學英國通用貨幣，老師一邊上堂一邊展示D英國大餅出黎俾同學們答係幾錢，好彩萬能生剛剛都儲起一套大餅，我地闔家就齊齊學數大餅喇。

老師嘅教學片

https://vimeo.com/497343674

其實英國嘅硬幣同香港嘅都有好多共通點，當然喇，要記得香港嗰套當年喺邊度抄返黎嘅。

£1同HK$10好似，都係兩種色嘅，入面銀出面銅，不過英國仲多左個£2硬幣，一樣係兩種色，但面積比£1大。

其他硬幣都係幣值細嘅就銅色，幣值大嘅就銀色，都係同香港一樣。但分類就有D唔同，1p, 2p係銅色，5p, 10p, 20p, 50p係銀色，20p同50p有角嘅。

萬母一路聽老師問書，一路都覺頭暈暈，因為剎時間真係記唔到，分唔清D硬幣，而家終於明白點解D細路學香港通用貨幣時會攪亂晒，原來有D野對於我地見慣見熟黎講好似好易咁，但初接觸真係會覺得難嘅，以前錯怪左D細路添。

攪唔清D大餅其實都會幾尷尬嘅，特別係手上拎住一堆大餅，係咁睇係咁搵時，收銀員伸手過嚟一拎就係，呢D情況以前去旅行時經常發生，好彩喺而家英國都興contactless payment, 拎住張debit card就通行無阻，當然cash仍然通行嘅。

英國呢邊先前一路都話停課停到term break(即2月中)，而家又放風話可能停到復活節(即4月中)，睇怕都有排要繼續網課，咁就可能俾萬能生講中，阿妹可能會無啦啦升左Year 4，阿妹升左小一後，只返左5.5個月實體課，由香港到英國都不停上網課，其實上網課都有利又有弊嘅(自我安慰中)，或者呢個係上天俾萬母認識英國小學課程嘅機會，又可以輔助吓小文盲學習喇。

萬母覺得好彩我哋由香港帶定每人一部laptop嚟，嚟到上網課同娛樂都好方便，亦覺得一到步就有scanner連printer令到上網課同交功課順暢好多。所以，打算過嚟嘅朋友要考慮吓駛唔駛買定D電子產品先喇，呢邊買野要打稅~VAT20%，但又要留意printer嘅墨呢邊有冇得賣，我哋喺香港用開嗰種就冇，所以最後我哋係放棄咗部printer ，過嚟重新買過嘅。

BBC講學校復課嘅新聞連結

https://www.bbc.co.uk/news/uk-55791914?at_custom1=%5Bpost+type%5D&at_custom4=99377D52-5EE1-11EB-8DC7-183616F31EAE&at_medium=custom7&at_custom3=BBC+News&at_custom2=facebook_page&at_campaign=64&fbclid=IwAR1JAlkVu8L3dZH86HFZEdJtbLvxEy7cPSrJDuPXs6vK4FaAT2Lq7cdqTro

//神未曾應許，天色常藍，人生的路途，花香常漫，

神未曾應許：常晴無雨，常樂無痛苦，常安無虞。

神卻曾應許，生活有力，行路有亮光，作工得息。//

登記GP(家庭醫生)

喺香港要睇醫生好容易，只要拎住身份證同錢走落街，行入任何一間有開門嘅診所就得，頂多只係要等2-3個鐘，但喺英國要睇醫生，一係朝早8點去排隊, 一係打幾百個電話試吓當日運氣打唔打得通，但無論係現場排隊定狂打電話，事前都要先登記好NHS，有GP(家庭醫生)肯收留先得。

所以萬母一安頓好新居就係幫全家人登記GP。去下面個網站輸入post code可以搵到屋企附近有咩GP，佢會由最近嘅開始列出黎，click入去會見到地址，電話，診所網頁，開診時間，最重要係睇到其他人嘅reviews，萬母揀最近嘅兩間診所黎睇reviews，評價有好有壞，壞嘅通常都係話等好耐先有人接電話，到電話接通時已經full booking，根本用唔到電話去約時間，又或者係投訴個receptionist無禮貌呀，呢類負評最多，好評係就話打流感針安排好順暢呀，之類咁喇。

輸入postcode搵就近嘅GP

https://www.nhs.uk/service-search/find-a-gp

咁睇完comments就自己考慮地點同評價，再去決定登記邊個GP，但要留意，有D GP已經好full，唔再接受新症，所以咪書前都要開一開GP個網站睇吓先佢仲收唔收新症先。

登記GP有咩程序呢？第一樣要做嘅係填GMS1表，呢張表可以去GP診所拎，亦可以自己上網print出黎填，入面主要填個人資料，登唔登記捐血同捐贈器官。

https://www.gov.uk/government/publications/gms1

另外唔同嘅GP可能都有附加問卷要填，問吓身高/體重，有冇食煙飲酒，運動習慣，藥物敏感，長期用藥等。

細路仔仲會問埋疫苗紀錄，所以細路嘅針卡一定要帶喺身，千祈唔好寄左船。我哋登記嗰個GP，要填小妹們嘅打針紀錄，但萬母實在睇唔明份表，究竟邊支針打邊支針， 所以最後索性成張針卡影印夾落去交，去到診所時姑娘問有冇針卡呀，萬母話夾左影印本落去，姑娘仲讚brilliant添，其實係太stupid唔識填表就真。呢個姑娘好nice，隔住口罩都feel到佢微笑，姑娘兩次見到小妹們都問係唔係twins，小妹們不停被英國人問係咪孖生，攪到都懷疑自己究竟係咪一孖。

以下網站有英國細路打疫苗嘅時間表，萬母真係唔多識睇喇，有心人可以自己去望望。

https://www.nhs.uk/conditions/vaccinations/nhs-vaccinations-and-when-to-have-them/

我地第一次帶齊文件去診所想登記，點知姑娘話要約appointment先得，明明網頁寫幾點至幾點去就得，可能係而家疫情關係喇，所以要預約，建議唔想白行一轉，最好打個電話問清楚先。

咁究竟要帶咩文件呢？

1. GMS1表

2. 身份證明文件(passport)

3. 地址證明 (我地GP唔收council tax單，要收水電煤/銀行單)

4. 針卡副本 (細路適用)

最後我地跟appointment時間上去，只係幾分鐘時間就成功登記GP，一星期後仲收到NHS寄黎嘅確認信，上面有個unique嘅NHS Number，要好好保管，睇醫生時要用。

要留意番，就算成功登記NHS，都未代表可以免費睇醫生架，但如果VISA已包費用，到時出示證明就得。信入面亦有教，如果萬一touchwood要睇急症可以點做，下面條link亦可以search到附近嘅A&E / Urgent care service, 留個紀錄以備不時之需。

https://www.nhs.uk/service-search/other-services/Urgent-Care/LocationSearch/1824

呢邊興小病自己買成藥食或休息吓等身體自己好番，真係非必要都唔去排GP嘅，所以萬母都唔希望將來可以分享排GP經驗，我只想身體健康，小病是福。

離開香港前，其實我哋都專登問左香港嘅家庭醫生攞左D平安藥，再入定D成藥貨，例如：食開嘅止痛藥，敏感藥，藥膏呀嗰D，因為怕黎到人生路不熟，要用起上黎好頻能。但其實呢邊除左藥房(pharmacy)，大型超市都有藥賣嘅，去開超市又可以望吓，咁睇熟左之後，將來存貨用晒都識得買。

小貼士：

1. 細路記得針卡跟身

2. 如果有睇開公立醫院，拎定病歷記錄

3. 準備定平安藥/常用藥

祝大家身體健康，GP常吉！

落雪呀~~

上星期某朝早曾經有飄雪，可惜太早，天都未光，小妹們未起身，錯失了。

尋日黃昏又再次飄雪，但正當小妹想換衫落街時，雪停了。

今日再見到落雪，小妹即換衫落街，雪越落越大，小妹們玩到唔捨得走，鄰居們都走晒出黎玩。感恩我地尋日出左超市入貨，今日落大雪可以安全地宅在家中。

小妹們心聲：好開心呀，如果可以日日都落雪就好喇！

萬母心聲：凍到流晒鼻水，好彩戴住口罩冇人見到咋。

小妹暖心提醒：整雪天使時記住合埋對眼。

我係香港人，我講廣東話

上回講到老師鄰居親手拎左封入學資訊信黎。

由於lockdown，本來1月初見校長攪入學手續被迫無限延期，學校終於決定用zoom meeting代替，同埋送左D表格上門俾我地填。

表格內容冇咩特別，都係填吓個人資料，家長資料，特殊健康狀況，敏感狀況咁， 不過有樣野要習慣吓嘅，就係寫名嘅次序。

喺香港我地都係先寫姓後寫名，例如萬小妹係寫成MAN Siu Mui。

但英國就唔係咁(其實好多國家都唔係)，姓氏係喺最尾嘅，即係全名要寫成Siu Mui MAN。

如果張表係分開姓(surname)同名(given name/forenames)，咁就好清楚喇，但如果得一條線呢，就要留心喇，因為好容易手快快寫返香港格式，寫名呢家野萬母都仲要慢慢適應。

仲有呢邊好幾興用initals，有時D信係寫S M Man, 個名只有頭一個字母，或寫係Siu MAN, 用左個Siu當名, Mui當middle name無出，最後係姓MAN。

如果屋企人個initals係一樣，或者好似小妹們咁，個名3個字頭2個相同，有時D信寄到黎都唔知究竟係邊個嘅，要拆開先知。

講返封入學資訊信先，除左個人資料表格，學校仲有兩張表係填"種族"同"家用語言"嘅。

張"種族"講明唔關國籍，出生地事，係關你點睇自己，可以係根據膚色, 語言，文化，祖先，家族歷史嘅。而呢D資料係作統計用，唔會拎黎identify個別學生。

萬母睇完張表，毫無懸念咁剔左Any other ethnic group，並註明Hongkongers。

萬母雖然唔係讀statistics出生，但香港小學數學科課程都有教，統計圖入面嘅"其他"只係包D少數項目，如果係大數量嘅，就會獨立成項，唔會歸入"其他"嘅。今日或者"香港人"並唔係一個選項，但只要夠齊心，數據夠多，假以時日佢一定會成為一個獨立嘅選項，唔需要再剔others。

除左ethnic group, 細路嘅母語都係統計之一，呢個更加明顯喇，非廣東話莫屬。

希望到小妹升中學時，萬母再填入學表時，Hongkongers與Cantonese都可以係有得剔嘅項目。

#我係香港人

#我講廣東話

世界真細小小小，小得真奇妙妙妙

呢個故事說來話長，萬母只好分scene去講。

Scene 1

喺到步初期，我哋仲住喺BNB時，每日都會過黎抹吓屋，砌吓家俬，準備入伙，有一日我哋喺樓下見到個靚仔拎住袋垃圾去左某個方向，轉頭就見佢返黎冇左袋垃圾，跟手再發現佢係我哋對面屋嘅鄰居(我哋呢度一梯兩伙，全層樓只得萬能家同鄰居)。

Scene 2

入伙後趁1月1日新年，我哋敲門同鄰居打招呼，順便將香港帶嚟嘅手信送俾佢，得知鄰居叫Mr. M。

Scene 3

National lockdown，學校停課，小妹們未到學校報到已轉上網課，因為要準備旁聽，萬母都早左起身，發現鄰居都好早起身喎。嗱，澄清返先，萬母並唔係變態嘅，唔係專登𥄫人架，只係大家大門對大門，而且兩道大門嘅上半部都係磨沙玻璃，所以開左燈係會透光嘅。咁萬母又開始無限聯想喇，咁早起身嘅，做邊行嘅呢？會唔會係教書架？係呀，萬母成日都覺得早起身嘅就係教書架喇。

到小妹上網課時，發現原來阿班主任咁啱又叫Mr. M，萬母就同小妹講笑話，班主任同鄰居同名喎，會唔會其實鄰居就係班主任呢？但其實我哋已經唔記得鄰居個樣。

萬母同小妹一邊上網課，一邊進行探究討論，如果我哋走去拍鄰居門，再睇吓老師有冇反應咪得囉，再唔係出走廊大叫，聽吓老師嗰video有冇聲又得，當然喇，我哋講就兇狠，做就.....就係咁，呢個探究活動只留於討論嘅層面，而冇付諸實行嘅。

Scene 4

過晒上堂時間，突然間有人拍門，係一個男人，個男人介紹自己話係Mr. M，小妹嘅班主任，亦係鄰居！！！吓，咩個世界真係咁細呀？！阿老師鄰居受校長所託，將封入學資料信親手送黎俾我哋，亦因為咁謎底就解開左。倫敦咁大，我哋竟然同老師做鄰居，真係唔唱返首"世界真細小小小，小得真奇妙妙妙"都唔得喇。

知道左老師係鄰居後，萬母又開始無限聯想，小妹們係咪可以跟老師鄰居返放學，唔駛萬母出動呀？見家長係咪可以移師去走廊進行，連街都唔駛落呀？學校要填second contact，可以係grandparents, relatives, neighbour，咁係咪可以填老師鄰居個名同地址落去，而電話就寫"I don't know wow, but you know la"？

不過放心，萬母係時而瘋狂，間唔時正常嘅，好明白家長同老師嘅界線應該喺邊，以上所講嘅只係一廂情願嘅瘋狂聯想，萬母並唔會對老師做出騷擾行為嘅，希望老師唔會嚇到漏夜搬走喇。