薰衣草田@Hitchin Lavender

暑假喺英國，睇花係必去行程。

薰衣草花期由6月底到7月底，剛剛去一放暑假就去睇，只可惜又係天氣不似預期，天灰灰，不過欣賞薰衣草除咗係視覺享受之外，嗅覺都好享受，處身薰衣草田中，嗰種天氣芬芳，真係令人心情舒暢。

今次我哋去咗迎北倫敦嘅Hitchin Lavender，

https://hitchinlavender.com/

一家四口入場£22.01

呢個場除咗薰衣草，到8月仲有太陽花睇，好彩嘅話兩種花可以一齊觀賞添。

King's College @ Cambridge

暑假有貴賓到訪，所以去咗好多地方玩，寫暑假遊記可能寫到聖誕都未寫住，有delay，請諒。

再次遊劍橋，今次選擇入King's College參觀個chapel，一早買定飛，可惜天氣唔多夾，明明幾個月都陽光普照，偏偏貴人出門招風雨，天色唔好，灰濛濛，加上草地乾到黃曬，所以視覺效果麻麻地。

King's College嘅chapel建築宏偉，但可能呢幾年參觀得太多類似教堂，有D審美疲勞，但如果未去過嘅，係值得一去，天氣好嘅話，個花園都好靚，仲要喺河邊，可以睇到人地撐篙(punting)，而我哋都認得上次撐篙經過呢處，King's College嘅河邊正正係"再別康橋"嘅石碑所在之處，上次冇去搵呢塊石碑，今次路過見到就望咗兩眼，再同小妹都講解吓呢位世紀殘男嘅故事。

由於天氣太過差，我哋參觀完King's College，同牛頓蘋果樹say咗個hi就匆匆離開咗劍橋喇。

暑假嘅劍橋好多遊客，遊學團都好多，好迫人。

https://www.kings.cam.ac.uk/visit/plan-your-visit

My Neighbour Totoro

暑假有貴賓到訪，所以去咗好多地方玩，寫暑假遊記可能寫到聖誕都未寫住，有delay，請諒。

龍貓舞台劇，身邊好多人都話好正，終於都同貴賓一齊去睇。

佈景好正！道具好正！Live band好正！

估唔到會用咁嘅方式去演繹卡通片嘅場景。

加上當年龍貓上映時，萬母係同家人一齊入戲院睇嘅，所以龍貓係童年回憶，又係情意結，真心覺得冇睇錯。

今次出演做到9月底，想睇嘅就快手喇。

https://totoroshow.com/

莎士比亞新居及墓地@Stratford-upon-Avon

最後一集莎士比亞故鄉，兩個比較冇咁吸引嘅景點。

莎士比亞新居 (Shakespeare's New Place) 係莎士比亞成名後買嘅大屋，可惜間屋轉手再轉手，而家已經夷為平地，後人將原地打造成一個花園同博物館，如果唔聽職員講解，真係睇唔出同莎生有咩關係。

另外一個景點係莎士比亞墓地，莎士比亞同佢嘅家人都葬咗喺聖三一教堂(Holy Trinity Church)，入教堂唔駛錢，但如果想埋去睇莎生個墳頸就要畀少少錢，唔記得係1磅定幾多磅。

莎生個墳最出名係佢嘅咀咒，因為佢曾經見證過教堂為咗擴建而掘起其他人嘅骸骨，佢怕有一日自己嘅骨都會被掘，所以就係個墓碑度寫咗個咀咒。

"Good friend, for Jesus' sake forbear,

To dig the dust enclosed here.

Bleste be the man that spares these stones,

And curst be he that moves my bones."

「善友啊，看在耶穌的份上，請勿侵犯此地，

這裡安息著我塵世的遺骸。

願尊重此石者蒙福，

擾動我骸骨者受詛咒。」

如果去Stratford-upon-Avon嚟個莎士比亞全面之旅，New Place同聖三一教堂都值得一去，但如果時間唔夠，呢兩個景點都係最尾之選。

其實Stratford-upon-Avon呢個小鎮本身都好靚，有D舖頭都好值得逛，有一間全年365日都賣聖誕掛飾嘅舖頭吸引咗我哋，帶正在學緊莎士比亞嘅中學生嚟Stratford-upon-Avon一次遊學之旅都係唔錯嘅選擇。