補打針記

小妹嚟英國之前，已經喺香港讀完小一，理論上要打嘅防疫針基本上都打曬，係差小六嗰D加強劑。

嚟到英國登記GP時，萬母都專登影印咗小妹嘅針卡交畀GP，等GP對吓D防疫記錄。

一直都相安無事，但最近幾個月，因為英國麻疹嚴重，萬母收到NHS嘅追魂call，叫萬母帶小妹返去補打麻疹針(MMR)，但萬母自己對過，麻疹針係打齊嘅，所以再將針卡畀GP對。

結果GP回覆萬母，麻疹針係打齊，但要補打腦膜炎針(Hib/MenC)，萬母自己上NHS網睇過，腦膜炎針直至10歲都可以補打，之但係小妹已經超齡了，但既然GP叫到，就即管去會一會佢。

會面當日，GP話由亞洲(特別註明香港同日本)嚟嘅小朋友都係喺家鄉冇打腦膜炎針，佢已經見慣見熟，但小妹已經過咗10歲，唔係打Hib/MenC，係打另一個名嘅針(MenACWY)。

萬母後尾對返香港同英國嘅防疫針，發現有幾種針係香港兒童免疫接種計劃冇包嘅，分別係：

乙型流感嗜血桿菌

https://www.chp.gov.hk/tc/healthtopics/content/24/8870.html

輪狀病毒疫苗

https://www.chp.gov.hk/tc/healthtopics/content/24/38.html

乙型腦膜炎球菌

https://www.chp.gov.hk/tc/healthtopics/content/24/2086.html

總結：記得將香港針卡副本交畀GP； 無論過唔過10歲，腦膜炎針係可以補打嘅，聯絡自己嘅GP就得。

戴頭盔：萬母唔係醫護界，如果個對照表有錯漏，請更正。有咩健康問題，一律建議問GP。

題外話：萬母同事個女(本地人廿幾歲)舊年夏天因為腦膜炎過咗身，所以萬母一聽到GP嗌去補打針，就一秒答應。

英國兒童防疫時間表

https://www.nhs.uk/vaccinations/nhs-vaccinations-and-when-to-have-them/

香港兒童防疫時間表

https://www.fhs.gov.hk/tc_chi/main_ser/child_health/child_health_recommend.html

Cadbury World @ Birmingham

兩年前已經想去Cadbury World，但因為太遲book，full曬。

期待咗兩年，滿心歡喜去，點知未入場已經排長籠，排咗大半個鐘先入到場。

入場即送每人一條朱古力+一隻朱古力蛋，之後就去睇展覽，有D電腦互動係幾有趣嘅。

離開咗展覽就繼續排隊，先排隊去拎杯裝朱古力，可以自己揀兩種配料，跟住就繼續排隊去坐車仔，一排排咗一個鐘有多，入去就玩咗幾分鐘，架車仔配有槍仔，射向螢幕可以攞分，唔算刺激，甚至悶悶哋，好快已經玩完出嚟，再去工廠後面睇埋4D。

4D旁邊有個公園，幾適合細細路玩，但呢個入場費再加呢個排隊時間，真係一次就夠，到此一遊，了結心事。

大人 £27 細路 £22

https://www.cadburyworld.co.uk/

後記：原來架車仔係今年新開，怪唔知咁多人喇，但呢個排隊時間真係排到人冇咩心機，可以嘅話，等新屎坑過咗3日先去，應該唔駛排咁耐。

三遊Hampton Court Palace

趁住年票未過期，嗱嗱臨去多次Hampton Court Palace。

室內嘅展覽基本上已經睇咗九成，今次睇埋Herny VIII嘅廚房，見識吓咩叫做煮大茶飯。

復活節期間繼續有尋兔活動，小妹拎住張地圖，自己搵路自己尋免，喺後面跟住嘅萬母真心覺得小妹大喇，自己決定前路喇。

雖然Hampton Court Palace嘅鬱金香節下星期先開始，但好多鬱金香已經開花喇，又可以做到一箭雙雕，抵曬。今次仲見埋全世界最大嘅葡萄樹，有埋健力氏證書。

離開Hampton Court Palace，去埋隔離嘅Bushy Park，諗住探吓D鹿仔，唔知D鹿仔係咪搬咗屋冇通知，影都冇，不過唔緊要喇，有花睇，有朱古力食，已經好滿足喇。

RHS Garden Bridgewater @ Manchester

平時想叫小妹去行公園都有難度，只能趁住復活節有尋蛋活動先可以引到佢哋出關。

復活節期間，園內有12隻巨型復活蛋，細路去尋蛋，大人跟住散步，其實幾寫意嘅，尋完仲有一舊朱古力做手信。不過入場費都唔平，一家四口都要幾十磅，如果係Salford居民就可以星期二免費入場。

Family Ticker £38.10

復活節期間其他RHS Garden都有尋蛋活動，可以趁機捉D細路離開電腦，親親大自然。

https://www.rhs.org.uk/gardens/bridgewater