英國嘅冬天認真唔易過，日照時間短，早早就天黑，又凍又濕，要捱過寒冬對萬母嚟過真係有難度。
今年萬母靠佢哋捱過咗，佢哋就係spring bulbs。
舊年入冬前，萬母將D spring bulbs埋咗入泥，之後成個冬天就冇理過佢哋，連水都冇幫佢哋淋過，去到冬末，意志力開始薄弱時，佢哋發芽生長喇，仲慢慢開始有花蕾，跟住仲開埋靚靚嘅花，見到靚花，真係心情都即刻靚翻。
連小妹都讚嘆，話出年要繼續種spring bulbs，萬母今年試過3種，紫色細細朵嘅番紅花最早開花，雖然佢細朵，但紫得好驚艷； 鬱金香同水仙差唔多時間開花，但鬱金香大大朵，睇得好快活，下年可以試多幾種色。水仙花起初期望佢農曆年時會開花，結果遲到一個月。
同場加映： 新入手嘅櫻花，希望佢出年繼續開花。
聽日就轉返夏令時間，總算又平安過多個冬天喇，感恩，感恩。
#這是天父世界
萬母從來都冇推介廚房用具，皆因係地獄廚神，都冇咩好推介畀人，再加上知自己三分鐘熱度，所以唔都敢多買，怕屋企多舊野封塵。
朋友好耐之前已經同萬母推介呢部Thermomix，中文名叫小美，但萬母一直冇睬佢，一來呢部小美好貴(過千磅)，二來真係怕新屎坑三日香。
最後係家中老爺頂唔住萬母嘅廚藝，再做埋research，就決定聽朋友勸戒，買部小美。
至今，呢部小美已經用咗一年，只要喺屋企開飯嘅日子，都一定用到佢，所以可以推介喇。
萬母點解覺得佢幫到手呢，因為佢除咗煎同炸之外，其他炆炒燉蒸，佢都做得到，萬母最欣賞佢係㩒個掣就會自己炒嘢，咁就可以free雙手出嚟做其他嘢，佢另有一個好幫到手嘅賣點，係可以subscribe recipe (Cookidoo)，跟住佢嘅recipe，就算腦殘手殘都煮到食，佢話落咩就落咩，煮幾耐就煮幾耐，只係乖乖跟足，9成9機會成功。
呢個食譜功能係萬母嘅救星，皆因地獄廚神除咗煮唔到之外，諗唔到煮咩都係問題，而家可以喺扮工時間，篤吓Cookidoo，睇定食譜，揀定想煮咩，有咩唔夠就放工去買，之後返屋企就跟住步驟做，用咗一年，萬母已經儲到幾個撚手小菜，小妹們唔再食到嗌救命喇。
小美仲有個萬母好欣賞嘅優點，就係有自動清洗功能，而且佢所有配件都可以入洗碗碟機，唔係驚煮完一大輪仲要洗一大輪先收得工。
不過小美都有缺點嘅，就係佢個主鍋唔大，煮一家四口就勉強夠，如果要煮大茶飯就要分幾次，同埋如果幾個餸都要靠佢就要排隊等喇。
BTW，介紹小美畀萬母嘅朋友本身係個廚神，佢話而家用小美炒菠蘿整鳳梨酥，唔駛再炒到手軟喇。
https://www.vorwerk.co.uk/en/c/home/products/thermomix
趁仲有記憶，要記得呢個恩典滿滿嘅考車記。
學車考車對於萬母嚟講係一個充滿痛苦嘅過程，甚至曾經因此跌咗入深淵。
但呢次考車記，真係滿有恩典，不記不可。
考車前一個月，師傅同萬母講，考車嗰日佢陪唔到萬母去，因為佢有個好重要嘅medical appointment，收到呢個消息都真係沉咗一沉，事關呢個期已經去到筆試限期，想改都冇得改，再唔得就要重考筆試。
師傅陪唔到考試，人嘅計畫就係用自己嘅車去考，點知都未開始操車，就收到更壞嘅消息，全家要急急返香港一轉，唔好講話操車，連學車都冇機會。
考車前一星期萬母同小妹終於返英國，之但係，冇操過車，又冇人陪考，心入面已經打定輸數，甚至盤算住取消個期，慳返幾十磅算數。
當考前一星期，萬母再跟師傅上堂時，師傅同萬母講，佢個medical appointment改咗期，佢可以陪萬母去考試喇，當聽到呢個消息時，萬母係忍唔住眼sip sip，因為喺絕望中突然有返希望。
就係咁，今次峰迴路轉，唔止有得考，仲pass埋，終於可以離開呢個深淵。
感謝神，因祂有說不盡的恩賜。
https://www.youtube.com/watch?v=hnsxlJCqOyI
#圖文不符
嚟英國之前，萬母從來未試過腳踭爆裂，嚟咗英國冇耐就開始裂，最嚴重時仲會裂到痛，簡直係一步一驚心。
試過喺大街買腳踭龜裂膏搽，但冇咩效，搽極都仲係裂。
後尾見人介紹呢隻法國牌子有效，就即管試吓，每日沖完涼就搽少少喺腳踭，跟住就著對襪，用咗幾個月，真係白滑返好多，如果大家有相同問題，都可以考慮一試。
官網賣緊£14/支，但有D網站會平好多，search Vinotherapist™ Foot Beauty Cream就可以搵到。
https://uk.caudalie.com/p/397/foot-beauty-cream-vinotherapist-397.html
偶然喺網上見人講呢本雜誌，見口碑唔錯，想買本嚟睇吓，點知搵勻各大超市都唔見有賣，最後都係上網買咗一本試讀。 睇過實物之後，覺得真心正，值得訂閱。 呢本雜誌嘅目標讀者係8-14歲嘅青少年，但萬母覺得大人都啱睇，特別係我哋呢D母語唔係英文嘅大人，因為有D生字，佢會配有英文解釋。 雜誌...
