龍年花開富貴

鈎吉樹都仲唔夠，手痕到鈎埋水仙花。

老實講，萬母都唔知自己為咩，可能係手痕？身痕？pat pat痕？

不過鈎野時係可以令到腦袋停止胡思亂想，某程度上都係平靜思緒嘅方法，如果你都手痕，或者想平靜吓，可以試吓鈎野。

下面係水仙花教學片，個盤係跟吉樹嘅，同吉樹襯埋一套。

https://www.youtube.com/watch?v=E-71EEIPP0g&t=566s

龍年大吉大利

自從舊年農曆年開始鈎吉樹，至今萬母牌吉樹已經遍佈英國各地兼港澳台。

細細嘅吉樹滿載大大嘅祝福。

無論你有冇萬母嘅吉樹震宅，都祝你龍年大吉大利。

想自己鈎棵吉樹都唔難㗎，萬母都係跟住下面嘅youtube學。

https://www.youtube.com/watch?v=VcFoMMWhyGU

https://www.youtube.com/watch?v=zA3ddj1TO8Q

我們愛，因為神先愛我們

今日除咗係情人節之外，亦係聖灰日Ash Wednesday。

而尋日係懺悔星期二Shrove Tuesday，亦即係Pancake Day。

呢兩個節日，都關基督教事，亦都係Life in the UK test嘅考試內容。

基督徒會喺復活節前進行40日(唔計其中嘅6個星期日)嘅四旬齋(Lent)，呢段日子係一個祈禱、克己、守齋、做善工嘅時間。而呢40日嘅第一日就係聖灰日(Ash Wednesday)，四旬齋嘅前一日係懺悔星期二(Shrove Tuesday)，亦係大家熟悉嘅Pancake Day，因為要準備開始守齋禁食，所以就要用盡屋企嘅雞蛋，麵粉和牛奶嚟整Pancake。

而喺聖灰日，有D教會會舉行塗灰禮，將把舊年棕枝主日祝聖過嘅棕枝燒成灰，在禮儀中塗在教友嘅額頭上，作為悔改嘅象徵。

舊年2023年嘅聖灰日唔係學校假期，所以學校都有舉行塗灰禮，傻更更嘅萬母見同事嘅額頭灰咗，以為佢咁唔小心，好彩當時忍住冇多口慰問，後尾見到好多學生個額頭都灰咗，先醒起嗰日係聖灰日，真係好彩冇多咀，否則就瘀爆。

鈎玫瑰教學片

https://www.youtube.com/watch?v=dHB6SdGUmf8&t=654s

龍年平安喜樂

年，又過年，共慶歡樂年年

第四年喺英國過年，仍然選擇一切從簡，感恩友人接濟，贈與賀年食品，屋企即刻有多少少過年氣氛。

新一年除咗要龍馬精神，更加要平安喜樂！

電飯煲豆腐花

豆腐花曾經係輕易得到嘅食物，但嚟到英國就變咗做稀品。

兩年前曾經用魚膠粉整豆腐花，但嗰種感覺唔係嗰種感覺(明就明，唔明就...)。

終於的起心肝買咗包石膏粉整豆腐花。

1. 電飯煲保溫預熱

2. 熟石膏粉0.5湯匙，粟粉1湯匙，加入Aldi無糖豆漿100ml攪勻

3. 無糖豆腐放入鍋中，煲至85度 (小心豆漿易滾瀉)

4. 石膏粉水易沉澱，所以用前要再攪勻

5. 雙手一邊倒入熱豆漿，另一邊同時倒入石膏粉水，蓋好電飯煲蓋及廚房紙

6. 安心等30分鐘，加糖食得

打開電飯煲蓋一刻都幾感動，似模似樣，只係冇個鐵剷，用飯殼片得唔夠薄，D糖又淺色咗D，但感覺還好，可以止到癮。

因為失去咗先懂得珍惜，事隔三年，最近再次飲腐竹糖水時，先知原來豆類甜品好易打動心靈。