一路都想去睇櫻花，但奈何3月天氣麻麻，一直都出唔到門，終於喺4月追到多重櫻嘅尾巴。
一入Greenwich Park嘅停車場就已經睇到粉花色嘅櫻花大道，好搶眼！
短短一條櫻花大道可以用人山人海嚟形容，香港人嘅比例奇高。
去Greenwich Park唔止賞櫻，我哋仲去埋格林威治皇家天文台(Royal Observatory)，嗰度最出名嘅就係本初子午線(Prime Meridian)。
//本初子午線（英語：prime meridian），即0度經線，亦稱格林威治子午線或本初經線，是經過英國格林威治天文台的一條經線（亦稱子午線）。本初子午線的東西兩邊分別定為東經和西經，於180度相遇。從北極開始，本初子午線會經過英國、法國、西班牙、阿爾及利亞、馬利、布吉納法索、多哥和迦納共8個國家，然後直至南極。
1851年御用天文學家艾里（Sir George Airy）在格林威治天文台設置中星儀，並以此確定格林威治子午線，也因為當時超過三分之二的船隻已使用該線為參考子午線，在1884年於美國華盛頓特區舉行的國際子午線會議上，22國投票同意正式定之為經度的起點，從此格林威治子午線成為了標準。//
除咗子午線，天文台入面仲有好多鐘，點解鐘同天文有關呢？原來係喺幾百年前，冇GPS嘅年代，D航海家出咗海就無法定位，好易盪失路同有海難，所以佢哋需要一個喺船上面都可以準確運行嘅鐘，顯示格林威治時間，再利用星象計算當地時間，咁樣利用兩個時間嘅差別就可以估計到船隻嘅所在地喇。
我哋參觀期間撞啱有職員開talk，講解呢個航海鐘嘅故事，職員講得生動有趣，半個鐘冇悶場，如果撞啱時間，值得一聽。
天文台入面仲有好多觀星儀器，真係好佩服D古人咁認真，除咗大大座觀星儀，仲有機關幫手開窗，真係寫個服字。
天文台仲設有Planetarium，有好多唔同嘅show，不過要另外買飛嘅，我哋今次就冇睇喇。
https://www.rmg.co.uk/royal-observatory
格林威治皇家天文台入場費
大人£18
細路£9
#這是天父世界
#發花癲系列
