遊Copenhagen哥本哈根

遊記真係delay得好嚴重，聖誕節都就到仲寫緊10月嘅遊記。

10月half term時去咗轉哥本哈根，由倫敦飛哥本哈根只需個幾鐘，由哥本哈根機場出市中心都好方便，3個火車站就到。

我哋揀咗住喺火車站附近，方便四圍去，雖然市中心嘅景點並非我哋杯茶，但到此一遊，打個卡點都走唔甩。

10月尾哥本哈根天氣相當清涼，10度上下，仲要每日都落雨，所以更加清涼。

哥本哈根有咩景點呢？首先有好多大大細細嘅博物館，不過小妹抗拒去博物館，而且我哋冇買哥本哈根卡，所以都冇入博物館。

我哋去咗Torvehallerne市集，類似有蓋嘅玻璃屋，入面有餐廳有舖頭可以解決一餐。

仲遠眺咗Rosenborg Castle，入面擺有皇室珠寶，不過我哋就冇入去喇。

Frederik’s Church（大理石教堂)係一個免費入場嘅圓頂教堂，但其實喺歐洲睇過好多教堂，已經有D審美疲勞。

新港又係打卡位，河邊好多七彩小屋，影相係幾靚嘅，河畔有好多餐廳。

//新港（Nyhavn）是丹麥哥本哈根一個建造於17世紀的濱水、運河和娛樂區。當初建造新港前這條人工運河就是將船隻引入市中心的新國王廣場(Kongens Nytorv)來促使經濟的發展，附近還有皇家劇場(Royal Danish Playhouse), 這條運河兩旁都是當時建造有豐富色彩特色的房子，一排房子看過去就是個彩色的童話世界！白天是彩色的牆面，夜晚則是燈紅酒綠的酒吧不夜城//

小美人魚雕像又係著名景點，由新港行過去，約20分鐘，如果天氣好係幾舒服嘅，小美人魚旁邊有個星型堡壘，喺google map睇就好明顯，但身在其中就唔覺係星型。

//美人魚雕像位於丹麥哥本哈根長堤公園的港口岩石上，是哥本哈根著名的觀光景點之一。 美人魚雕像在1909年時受到嘉士伯創辦人的兒子卡爾·雅布克森的委託，因為他以童話故事為題材的芭蕾舞感到著迷。於是在1912年，丹麥雕塑家愛德華·艾瑞克森根據安徒生童話並以妻子愛琳·埃里克森為藍本，雕塑了這尊美人魚雕像。//

安徒生係丹麥人，哥本哈根都有佢嘅博物館，不過我哋研究過後就決定skip佢。

大笨鐘之旅

大笨鐘，英文名Big Ben，其實佢正式嘅名係叫Elizabeth Tower，伊利沙伯女皇(即係我哋熟悉嘅英女皇)登基60周年時命名嘅，以前佢只得平平無奇嘅名字Clock Tower(鐘樓)，所以大家通常叫佢花名Big Ben。

大笨鐘係倫敦地標，去倫敦旅遊嘅人一定會去打卡，今次我哋唔止係打卡，係要登堂入樓，上去鐘樓上面探大笨鐘。

要登樓，有好多要求，首先要夠稱，大笨鐘之旅只限11歲以上人士參加，而且要登樓要行334級樓梯，所以太老行唔郁又唔得，必須要夠腳骨力。

其次要夠快手搶飛，一團只得15個位，一日只有5團，星期日唔開，所以手快有手慢冇，特別係星期六嘅飛，真係要早3個月book定。

每個月嘅第二個星期三朝早10點，就會放售3個月後嘅飛，所有想去嘅朋友就要留意喇。

講返個tour，全程約1個鐘45分鐘，要喺tour開始前至少半個鐘到達，門口職員會check飛，然後畀張fast pass你免排隊去security check，平日排入parliament可能要排1個鐘，但報咗big ben tour就可以打尖入去喇。

去big ben tour記住要著平底鞋，最好係波鞋添，由門口check飛嘅職員到帶隊嘅職員都再三咁檢查參加者嘅鞋，所以一定一定要著啱鞋。上去big ben前要放底所有個人物品，包括手提電話，職員會幫手鎖起所有袋，所以只得之前之後嘅相，大笨鐘內部就冇得睇相喇，that's way更加值得參加呢個tour。

雖說係334級樓梯，但其實中途係有休息位嘅，職員會有大家入休息房休息之餘仲講吓歷史，當然重頭戲就係睇大笨鐘真身喇，職員仲會較到準時搭正聽大笨鐘打鐘，真係好特別嘅經歷，我哋一家四口都覺得big ben tour值得一去，除咗睇嗰幾個鐘，我哋仲可以走去鐘面後面遊一圈，個感覺真係好特別，遊客不停喺下面影大笨鐘時，我哋就係鐘面後面做佈景版喇。

我哋上樓時仲天光，落樓時已經天黑喇，大笨鐘的日與夜都睇齊，抵呀！

簡單一句，big ben tour值得一去，趁仲行得郁時一定要去。

入場費：大人£35，細人£20

https://www.parliament.uk/visiting/visiting-and-tours/big-ben-tour/

羅瓦涅米 Rovaniemi

喺羅瓦涅米，我哋除咗去聖誕老人村之外，其實仲去咗幾個景點。

Ounasvaara冬天時係一個滑雪場，夏天就有條長滑梯可以玩滑坡車，夏天都唔係日日開，要睇天氣同睇時間，我哋好彩可以玩到，一致都覺得唔錯。

10 round 60€

https://ounasvaara.fi/en/summer/

北極圈科學中心暨博物館 (Arktikum Science Museum) 

https://arktikum.fi/en/

一家四口入場45€

//北極博物館介紹芬蘭北部居民的生活和歷史文化，它同時又是介紹芬蘭極地區域的科學中心，介紹相關的物理、生態和自然知識，其中一個小型的圓拱型球幕放映廳循環放映一套有關北極光的影片，介紹北極光的知識和極地居民對極光的傳說。北極博物館的建築物也相當獨特，展現了享負盛名的芬蘭設計。//

簡介話呢個博物館好多interactive可以玩，但實際其實唔算多，太細嘅小朋友會覺得悶。

Angry Birds Playground

Valtakatu 4, 96100 Rovaniemi, 芬蘭

呢個遊樂場雖然面積細細，但打卡一流。

喺芬蘭咁多日，我哋發現好多壽司自助餐，價錢唔貴仲幾好食添，不過冬天可能會嫌壽司凍冰冰。

芬蘭遊記終於都完成，當日去芬蘭時有廿幾三十度，而家芬蘭應該已經凍到結冰喇。