聖誕老人村Santa Claus Village

 今次芬蘭之旅嘅重點行程就係去聖誕老人村探聖誕老人，聖誕老人村其實唔算大，但我哋都足足玩咗成日。

我哋由羅瓦涅米市中心call車去聖誕老人村，車程只係十零分鐘，我哋喺芬蘭除咗步行之外，都係call車，好少搭公共交通，起初我哋用芬蘭的士app(Meneva Taksi)嚟call車，後尾發現用uber call嘅話會平一大截，仲要嚟嘅車係一樣嘅，所以用uber方便又慳錢。

夏天嘅聖誕老人村少D遊客，冇咁繁忙，但當然氣氛冇冬天咁好喇，但"發冷西人"無辦法冬天去芬蘭，唯有夏天去完夢。

聖誕老人村景點

- 北極圈分界線Arctic Circle Line：可以喺北極圈彈出彈入

- 聖誕老人辦公室Santa Claus Office：去見吓聖誕老人，握口個手仔，見完聖誕老人買相&video盛惠55歐

- 聖誕老人官方郵局Santa’s Main Post Office：喺呢度寄postcard可得獨特郵戳，亦可以揀即日寄出定聖誕寄出，話時話呢篇遊記都拖到就嚟聖誕先出到

- 哈士奇園Husky Park：冬天可以坐雪車，但夏天天氣太熱，狗狗不工作，只可以摸同餵

- 聖誕老人寵物Santa’s Pets：類似一個小型動物園，可以餵馴鹿，小妹最開心嘅環節

如果唔怕凍，唔怕迫人，冬天去聖誕老人村，過白色聖誕的確會好好氣氛，但夏天淡季唔駛迫亦係另類選擇。

https://santaclausvillage.info/

VR夜車

玩完赫爾辛基，我哋就起行去羅瓦涅米，聖誕老人村所在城市。

可以揀搭火車或者飛機，我哋揀咗搭夜車去。夜車有兩班，一班黃昏7點幾開出，另一班夜晚11點開出，車程約12個鐘。

VR火車可以揀坐位，亦可以揀臥鋪，萬母呢種阿婆夜晚當然要躺平喇。

臥鋪都分兩種，貴嗰種喺上層，房內有碌架床一張，房內仲有浴室同廁所，平嗰種喺下層，房內都係有碌架床一張，但廁所同浴室喺走廊要共用。

我咃揀咗下層房，最重要嘅原因係只有下層房有連通房(connecting rooms)，我哋覺得咁樣最適合我哋嘅家庭組合。而且我哋預咗extend酒店房一晚，喺酒店沖好曬涼先上車，所以房內浴室對我哋嚟講作用不大。

之不過，要打通兩間房，必須要等operato嚟開鎖，所以上車後都要等一等先可以connected。

房內有洗手盆，雖然好細，會洗到周地濕曬，但都算方便，床鋪算舒服，但因為架火

車係一直行車中，所以會有聲音同感受到架車郁郁吓，就算懶瞓豬都未必瞓得好淋。

瞓醒一覺就去到羅瓦涅米，真係好方便，小妹今年初嘗瞓船同瞓火車，佢哋異口同聲話火車好瞓過船，皆因上次架船太早叫人起身，下次去埋瞓郵輪嘅話，唔知佢哋會唔會改變諗法呢？

https://www.vr.fi/en/night-trains

Helkatti Cat Cafe

去貓cafe已經係小妹去旅行嘅指定行程，今次喺赫爾辛基嘅貓cafe，入場費每人€5，可以留個半鐘。

只要係貓cafe，小妹必定話好玩，但同行大人就覺得呢間貓cafe麻麻地，太暗，太焗，太多人，貓太懶。

Any肥，起碼滿足到小妹，唔好呱呱嘈先。

https://helkatti.fi/