貴賓遠渡抵英，仲要喺英國過大壽，當然要去賀賀佢。
揀咗Fortnum & Mason嘅下午茶，一來係大牌子，二來唔算係天價，可以一齊開心慶祝吓。
倫敦有兩間分店可以食下午茶(其實香港都有一間，全球總共有3間)，總店The Diamond Jubilee Tea Salon最平都要每人£84，分店The Royal Exchange就每人£38，所以我哋揀咗去The Royal Exchange。
每人有一個三層架，食物足夠有餘，仲可以揀一壺茶。
如果計食物，萬母覺得上次York嘅Betty's Cafe好味D，可能係肚餓D?!
但Fortnum & Mason都唔差嘅，而且環境都唔錯，拎住餐廳張單去舖頭買嘢仲可以有9折添。
https://www.fortnumandmason.com/afternoon-tea
趁住天氣好，搵地方去，揀咗呢個Old MacDonald's Farm，貪佢暑假期間除咗有動物睇，仲有馬戲團，可惜個馬戲團有D雞雞地。
呢類Farm Park，早幾年我哋成日去，因為小妹鍾意摸&餵動物，除咗動物之外，仲有小型機動遊戲同室外及室內遊機場，10歲以下嘅細路真係會覺得係天堂，不過小妹已經過咗嗰個年紀，只係一家大細，扶老攜青去睇吓動物都開心嘅。
推介畀10歲以下喜愛動物嘅小朋友，真係會玩足一日唔願走嘅。
https://www.omdfarm.co.uk/
一家四口入場£84
想用最輕鬆嘅方法做遊客遊倫敦，除咗巴士團，遊船河都係一個好選擇。
皆因小妹有個變態媽媽，成日都想可以遊玩遊學習，所以揀咗呢個Horrible Histories系列嘅Terrible Thames，一邊遊船河，一邊介紹名勝同講解倫敦歷史。
小妹表示聽得明D歷史故事，貴賓表示輕鬆可以睇到名勝古蹟好梳乎。
感恩天父保守，天氣暖得嚟唔太曬又唔太大風，一個令人滿意嘅活動。
https://terriblethames.com/
一家四口 £70.00
夏天喺英國發花癲，除咗係薰衣田，點少得太陽花呢！
太陽花真係好易令人心花怒放，一朵朵好似小太陽咁，仲要面向同一個方向，正爆！
太陽花田仲有個少少嘅太陽花迷宮，適合小朋友去玩，除咗太陽花，其實花田嘅雜花都好靚，仲要拎返屋企都可以插好耐。
太陽花花期由7月中至8月中，視乎天氣而定。
太陽花真人靚過上鏡，要好好記住太陽花嘅溫暖同喜樂，儲定多D能量留返冬天時用。
https://www.writtlesunflowers.co.uk/
Romeow Cat Bistrot其實係一間貓cafe，離開羅馬鬥獸場3個地鐵站。 如果想去，要留意開門時間，因為唔係每日都開放，亦都有落場時間，為免摸門釘，記住做定功課。 我哋係下午茶時間去，冇入場費，但每人有最低消費(一杯飲品&一舊蛋糕)，每人大約十餘歐。 呢間貓...
