喺英國住得越耐，越覺得英國人好重視聖誕，聖誕前夕嘅氣氛就好似香港過年前一樣，周街都係人，好迫，買買買，係咁買。
今個聖誕係萬能家喺英國過嘅第五個聖誕，第一年剛到步，家徒四壁，連床都係聖誕前剛砌好。
到第二年開始就會去吓聖誕市集，見吓聖誕老人，睇吓聖誕芭蕾show等等。
今年我哋揀咗去坐火車，其實一路都想試坐蒸汽火車，但奈何每次排行程都排唔到落去，今次終於一嘗所願，仲要一次過滿足曬兩個願望，坐火車加睇燈飾。
火車喺Sheringham開出，去到Holt後停留25分鐘，之後就折返Sheringham，全程約1個半小時。
由喺火車站開始已經好好氣氛，D裝飾，人嘅打扮，行車期間會有音樂/講故事，配合窗外嘅燈飾，未試過呢D體驗嘅真係值得一試。
唔止帶住細路嘅家庭會參加，車上仲有阿公阿婆同後生情侶，所以真係老少咸宜嘅活動。
睇實物靚過影相/拍片，有興趣嘅朋友今年仲有機會，呢個Norfolk Lights Express行去1月4日都仲有
https://nnrailway.co.uk/the-norfolk-lights-express/
票價由£25起。
最早一批嚟英國嘅BNO人士，應該知道咩係BRP(Biometric residence permit)，類似身份證嘅一張卡仔，而全英國嘅BRP將會喺2024年年底到期，而英國政府已經決定唔再出BRP，改用e-visa，持BRP人士今年都陸續收到home office通知要轉e-visa，喺開初嘅階段，個app有bugs攪到大家頭都大埋，終於等到個app攪掂，成功轉成e-visa，但當我哋喺比利時回程時，就發現出事喇。
拎住BNO護照嘅大人冇問題，好順利可以入到境，但係拎特區護照嘅細路就唔得，(註：小妹喺呢幾年曾經換過護照)，個關員好醒目，佢問萬母"小妹真係住喺英國嘅？"，萬母答"係!"，跟住關員再問"你哋有冇D咩卡？"，雖然阿關員當該冇講明係咩卡，但好彩萬母該秒頭腦清醒，即係諗起張BRP卡，拎出嚟畀關員，跟住小妹就可以入境喇。
以下內容非常重要，曾經持BRP人士特別要注意。
阿關員同萬母講，我哋呢個case好common，即係好多人都同我哋一樣攪錯，當初萬母以為BRP即將到期，所以e-visa係用嚟取代BRP，咁申請e-visa時就好自然用咗張BRP做身份證明文件。
但原來係錯！錯！錯！
英國政府嘅邏輯同萬母嘅截然不同。
阿關員解釋話個e-visa唔可以link落去張BRP度，因為張BRP即將過期，要將個e-visa link落本護照度先得。
OK！解釋得咁清楚，萬母返屋企就即刻做野喇，只要login返去申請e-visa時開嘅UKVI戶口就可以add an identity document，大人由BRP轉做BNO passport，基本上係秒批。
細路由BRP轉做特區護照，等咗4日就被reject，原因係小妹嘅國籍唔同咗！！！
究竟係咩意思呢？原來BRP嘅國籍係寫HK，而特區護照係寫China，所以home office就覺得唔同咗。
咁點攪呢？都唔係冇得攪嘅，但就要將本護照正本寄去home office度，等佢核實咗先。
萬母1號用掛號方式寄出護照，一直都好擔心會有咩差池，幸好19號就以掛號收返本護照，當日上UKVI account睇都未更新資料，到26號就見到update咗喇，前後用咗3個幾星期順利攪掂，真係好感恩嘅。
應該話係非常非常感恩先啱，因為唔駛一個月就完成，萬母個friend，同期做相同的動作，結果佢收返嗰本係人地嘅護照，home office將兩個人嘅護照對調咗，呢個錯真係非常british!
結果，當我哋攪掂曬呢D更新e-visa程序時，home office就出封新email，應該係發現咗呢個國籍問題，攪到好多人寄本護照過去，發現捉蟲了，而家叫人揀"No, my personal details have not changed"，咁就唔駛再寄護照，如果有網友收到呢封email先去update，麻煩分享吓係咪唔駛再寄諼照？Thanks！
//位於布魯日城堡廣場一角的「聖血聖殿」，為12世紀所建成的一座十分獨特的教堂，教堂外觀較為吸引人的是牆面上雕有8座進黃色的雕像，讓路過的人很難不注意到它們；而教堂內部則分為上、下兩層樓結構，原是羅馬式建築，但在16、19世紀多次翻修後，上層改為「新哥德式」的藝術風格。另外，這座教堂之所以會稱作為聖血聖殿，是因為這裡收藏著「耶穌的聖血」。//
老實講，聖血聖殿對於萬能家嚟講並唔係特別吸引嘅景點，只係佢免費入場就即管入去睇吓，可惜聖血收埋咗，睇唔到真身。
不過，聖血聖殿同城堡廣場附近嘅街都有好多舖頭，好多嘢睇，好多嘢買。
https://holyblood.com/homepage-of-the-basilica-of-the-holy-blood
我哋喺布魯日住咗兩晚，睇曬布魯日的日與夜，除咗先前提過嘅布魯日景點，其實都有周圍盪，去咗好多地方。
包括布魯日鐘樓Belfort，雖然我哋冇畀錢爬上鐘樓，仲有市集廣場Markt，十字門同運河旁的風車磨坊，其實仲有好多小景點，小博物館，如果啱口味，可以好多嘢睇，亦可以考慮參加city tour或者坐馬車，仲有啤酒體驗，要玩真係仲有好多得揀。
布魯日仲有好多評分好高嘅餐廳，如果有指定餐廳想試，建議要預約，否則只能得個睇字，連排都冇得排。
布魯日感覺悠閒舒服，係值得一遊的小城市，非常推薦。
Romeow Cat Bistrot其實係一間貓cafe，離開羅馬鬥獸場3個地鐵站。 如果想去，要留意開門時間，因為唔係每日都開放，亦都有落場時間，為免摸門釘，記住做定功課。 我哋係下午茶時間去，冇入場費，但每人有最低消費(一杯飲品&一舊蛋糕)，每人大約十餘歐。 呢間貓...
