起初冇諗住去歷史博物館嘅，因為怕悶，本來萬母係想去啤酒廠，但小妹話唔飲酒仲咩要去睇啤酒廠，結果就去咗睇歷史博物館喇。
呢個歷史博物館有一部係VR體驗，約8分鐘長，畀你睇返舊時嘅布魯日，欣賞中世紀嘅建築風貌。
而主館係跟隨揚·范·艾克(Jan van Eyck)嘅學徒嘅故事，講述返布魯日黃金時代嘅歷史，故事入面仲提到《聖母和聖嬰與教士范德帕勒》The Virgin and Child with Canon van der Paele呢幅名畫。
歷史博物館仲有個高塔，可以上去俯瞰現代城市嘅360°全景，如果唔上高塔，喺二樓露台望返去鐘樓同Market Square都好好景。
https://www.historium.be/en
VR體驗，主館同高塔可以分開買飛，鍾意點配搭都得。
小妹揀咗個朱古力工作坊，咁萬母都唔執輸，揀返個鑽石博物館。
布魯日鑽石博物館介紹咗鑽石嘅歷史，原來鑽石切割技術係喺五百幾年前喺布魯日發明嘅。喺呢度，你可以學到更多關於鑽石嘅知識，每日中午12:15仲有鑽石切割示範，可以了解切割鑽石嘅過程。
起初睇網評，D人話呢個博物館好細，冇咩嘢睇，但雖然細細哋，有D展覽可以動手體驗，都幾吸引。
除咗鑽石切割示範時，全館都唔可以影相，除咗睇展覽，呢度都真係有鑽石賣㗎，購物癮起時都仲有機會止吓癮，仲可以用€13買粒全世界最細嘅真鑽石，收到呢位石嘅人究竟應該開心定唔開心呢？
https://www.diamondmuseum.be/
比利時除咗尿尿小童出名之外，另一種最出名嘅應該就係朱古力喇，當決定咗去布魯日之後，萬母就開始搵景點，起初想去朱古力博物館Choco-Story, Chocolate Museum 兼去埋整朱古力，但小妹反對，話唔想去博物館咁悶，佢自己上網search咗個朱古力workshop，話比萬母搵嗰個評分更高，既然佢有做功課，當然順佢意喇。
有兩種朱古力工作坊可以上，松露朱古力工作坊年齡限制係8歲以上，需時約1.5個鐘，另一種要12歲以上，需時2個鐘。我哋揀咗松露朱古力工作坊。盛惠成人€32，細路€26。
雖然價錢唔平，但自己整朱古力都真係幾過癮，整好嘅朱古力可以自己帶走，如果鍾意朱古力嘅朋友值得一試，好玩！好食！
https://www.belgianchocolateworkshop.com/things-to-do-brussels/book-chocolate-bruges-truffle.html#book
上回講到我哋買咗火車飛去布魯塞爾Brussel，結果最後改變心意轉去布魯日Bruges。
但因為都係途經布魯塞爾，所以我哋都去打個卡。
將行李寄存咗喺火車站，我哋就用腳出發，先經過跳蚤市場Place Du Jeu De Balle flea market ，萬母自己對跳蚤市場呢類擺放唔整齊嘅市集冇咩興趣嘅，只係當路過睇吓，喜歡尋寶嘅可能會好開心。
離開跳蚤市場，我哋就去比時利最出名嘅景點進發，之唔係個尿尿小童Manneken Pis囉。
老實講，一見到佢就覺得佢好細，又黑又細，唔係有一大班遊客圍住佢，真係路過會miss咗，當日佢冇衫著，但就係鍾意佢夠raw。尿尿小童附近幾條街都係遊客區，當然唔少得比利時特色小食，waffle同薯條喇。
邊行邊食，去埋金碧輝煌嘅布魯塞爾大廣場Grand Place，整個廣場也被列入世界文化遺產，的確歐洲味濃，同倫敦好唔同呢。
再行埋聖休伯特拱廊街 Royal Gallery of Saint Hubert，只係10月尾，已經有舖頭掛上聖誕裝飾，真係好靚，喜歡奢華風嘅可以一試聖休伯特拱廊街入面賣嘅朱古力，喜愛平民風嘅就建議去超級市場買化算D。
布魯塞爾的確如網上咁講，個城市一陣尿味，可能係因為公共廁所都要畀錢先入得，或者大家都效法尿尿小童咁四圍痾喇，總之喺布魯塞爾嗅覺唔多好受。
打咗個卡，我哋就搭Metro返布魯塞爾火車站，再搭車去布魯日Bruges。
暑假大旅行後一直囉囉攣，結果暑期都未完就買定half term嘅火車飛，本來想去巴黎，但覺得車飛偏貴，最後㩒㩒吓就㩒咗去比利時，一家四口Eurostar來回300磅有找。
買咗車飛先做research，見布魯塞爾Brussel(比利時首都)風評麻麻，D人話治安唔太好，周街都係尿味，所以最後轉軚去咗布魯日Bruges。
今篇先講一吓交通安排，由倫敦出發嘅Eurostar要早一個至個半鐘check in，我哋因為貪平買咗朝早8點出發嘅車，結果5點就要起身準備出發，幸好係剛轉冬令時間，變相瞓多一個鐘。
可能我哋算早買飛，冇特別揀位就已經被安排坐四人座，即係兩個兩個面對面咁坐，中間有張窄長檯，個人覺得四人座比較舒服，雖然實際空間都係一樣大，但視覺空間會寬敞D，由倫敦去布魯塞爾車程2個鐘，帶D早餐，帶埋書上車睇，眨吓眼就到咗。
既然路經布魯塞爾，點都要去打個卡嘅，喺火車站寄存行李，我哋帶咗兩隻細唿，租咗一個XL locker，盛惠€11。下面連結可以見到邊個車站有locker租。
https://www.belgiantrain.be/en/station-information/nmbs-stations/luggage-storage
由布魯塞爾車站去市中心，步行約20-30分鐘，亦可以揀搭Metro，單程每人€2,70。
由布魯塞爾搭火車去布魯日，車程約1個鐘，每20分鐘左右就有一班車，好方便，成人每程€17，青少年€7,50，12歲以下免費。有網站有app可以睇到班次，甚至火車資料，可以嘅話揀班雙層車坐，去程時我哋坐單層車，結果好多人，差D冇位座，亦真係有人冇位座，回程時坐雙層車，大把位揀，舒服好多。
https://www.belgiantrain.be/en
由布魯日車站去市中心，步行約15-20分鐘，亦有巴士可以坐，但車站職員教我咃搭免費接駁車，真係出門遇天使。
就係咁，歐洲之星初體驗就平平安安地完成，下次分享玩咗咩。
終於終於寫到聖誕假期喇，聖誕假期，我哋去咗轉羅馬。 第一天行咗市中心幾個大景點。 //西班牙階梯是位於義大利羅馬的一座戶外階梯，與西班牙廣場相聯接，而山上天主聖三教堂（Trinità dei Monti，由法國波旁王朝的國王所資助建造）就位在西班牙階梯的頂端。西班牙階梯無疑是全歐...
