啱啱先post完half term之旅，轉頭又到暑期大旅行。
呢個星期，萬母被邀請返公司OT幫忙A-level放榜。
幫咩呢？放榜前一日，萬母幫Exam Officer手將D成績單連埋其他支援資料入信封，呢項真係手板眼見功夫，甚至有少少庇護工場feel，最高難度係咩呢？就係要對番信封上同成績單上嘅學生名，入錯信封，學生收錯成績單就大穫喇，所以呢項工作應該係高級庇護工作嚟嘅......
返咗呢日工，萬母知道原來成績單係早一日已經發出(呢個其實都同香港相似)，而且仲係要學校自己print出嚟，除咗Exam Officer同部份學校高層，其他老師都唔可以睇成績資料住，所以Exam Officer都叮囑萬母要封口，未放榜都唔可以講漏任何風聲。
放榜當日，萬母都返咗OT，原本預計係幫預科阿頭手，幫D學生向大學求情，但幸運嘅係學生派得唔錯，萬母只負責R手指，但用旁觀者身份去觀察A-level放榜都係一個好體驗。
以下係萬母用香港考試過來人身份觀察到英國A-level嘅見聞，戴番個頭盔先，可能好低能，亦可能唔係事實嘅全部。
A-level同埋大學offer係同日放榜，所以學生除咗知道自己考成點，都即曰知道自己入唔入到心儀大學嘅。
學生嘅成績單除咗有佢哋每科嘅grade，仲有佢哋嘅得分，包括每份paper嘅細分； 同一時間exam boards亦會公佈grade boundaries，即係幾分以上係A*，幾分以上係A等等，呢D資料看似唔重要，但有時卻好重要，特別係差少少入到心儀科系時，如果發現只係差幾分就可以高一個grade，係可以即時向大學求情，睇吓有冇得掹。亦可以考慮appeal，睇吓升唔升到grade，如果想appeal，就要同學杖嘅exam officer傾喇，詳情就唔講喇。
A-level考生當初揀科系時，只有5個志願，而報大學亦喺Year 12(即中六)學期尾就開始，即係而家呢刻班Year 13放榜，其實佢哋班Year 12嘅學弟學妹已經準備緊報大學㗎喇。
報大學嘅程序可見政府官網，今日都唔詳講。
https://educationhub.blog.gov.uk/2022/11/02/applying-to-university-everything-you-need-to-know/
如果萬一唔好彩，考得麻麻地，5個志願都落空，咁點算呢？都未係世界未日嘅，英國呢邊有樣野叫Clearing，萬母理解成大學嘅叩門，去下面個網站係可以睇到邊D科系仲有學位，而入學要求大約係咩，睇啱咗就可以直接打電話畀大學，如果成績達要求，仲可以即時有offer，萬母見證咗一個學生攪咗一朝，最後由冇offer，變手揸4個offers，所以窮途未必係末路，最緊要保持冷靜，有家人/朋友支援就更好喇。
https://www.ucas.com/clearing-launch
下個星期輪到GCSE放榜喇，萬母又有機會理解英國嘅升學制度喇。祝願GCSE考生們都考到如願嘅成績，搵到自己嘅出路。
一年前，朋友已經推介我哋去遊白金漢宮，可惜當我哋想去book飛時，白金漢宮因為女皇駕崩已經暫停開放。
白金漢宮係英皇嘅主要居所同辦公室，所以每年只係夏天開放幾個月，今年(2023年)係由7月中開放到9月尾，所以D飛非常搶手。
白金漢宮入面唔准影相，大件行李唔准帶，入口有嚴格嘅security check，而廁所係出口先有，所以去參觀要好好準備。
話曬都係皇宮，入面金碧輝煌係預咗，今年仲有登基特別展覽，可能因為咁，更加多遊客去參觀。
由於係遊客熱點，扒手都特別多，我哋都差D中招，幸好力保不失，所以去人多擠迫嘅地方真係要小心財物。
一家四口，入場費要£77，臨離開前可以喺出口蓋印，將入場票換成年票。
https://www.rct.uk/visit/buckingham-palace
舊年夏天，萬母都想帶小妹去睇Frozen Musical，諗住佢哋會好開心，點知佢哋話太babyish，唔肯去。
但今年為咗畀小妹公一嘗倫敦名物-音樂劇，我哋最後都係揀咗Frozen嚟睇，原因係小妹公唔識英文，睇其他劇係唔會睇得明，但係Frozen套戲佢睇過300次，所以睇frozen musical佢一定明。
當年小妹公陪小妹睇frozen movie 300次，今日小妹陪小妹公睇1次frozen musical。
好，講返套musical先，場內有好多個Elsa，大部份細路都變身Elsa，開場時旁白勸告觀眾，為免影響其他人觀賞，請勿傾計同跟住唱歌，真係第一次聽到咁嘅勸告。
套musical係精彩嘅，有幾個場口簡直係拍爛手掌，喜愛Frozen嘅細路當然值得一睇，就算唔愛Elsa，都一樣覺得精彩。
今次我咃用Disney Tickets Magical Mondays嚟買飛，劃一票價£29.5，我哋用£29.5買到原價£69.5嘅飛，不過Magical Mondays嘅缺點係冇得揀位，只能等system派，每次reload可能出唔同嘅位，有心機嘅話reload多幾次可能會搵到較靚嘅位，如果想睇又唔介意last minutes先買飛，可以一試。
https://www.disneytickets.co.uk/disney-day-seats-tickets
偶然喺網上見人講呢本雜誌，見口碑唔錯，想買本嚟睇吓，點知搵勻各大超市都唔見有賣，最後都係上網買咗一本試讀。 睇過實物之後，覺得真心正，值得訂閱。 呢本雜誌嘅目標讀者係8-14歲嘅青少年，但萬母覺得大人都啱睇，特別係我哋呢D母語唔係英文嘅大人，因為有D生字，佢會配有英文解釋。 雜誌...
