Oxford Castle and Prison @ Oxford

行完The Story Museum，見時間尚早，就去多一個景點。

Oxford Castle and Prison入場費，兩大兩小要£50.4，而且佢只能跟guided tour先可以入場，限定每20分鐘一場guided tour，所以要預好時間去，或是預早上網買定飛。

入場時先跟導遊上St. George's Tower，喺窄窄彎彎嘅樓梯，搭級而上，總共101級先到頂，導遊話全部城堡嘅樓梯都係咁窄窄彎彎，因為係有防衛功能，原來童話書入面公主住嘅城堡其實唔多舒服。

導遊每一站都停低講吓城堡嘅歷史，傳說，又講吓呢個城堡曾經做過監獄，困過咩人，包括偷(借用)鄰居手推車嘅細路，入面亦展出當時囚犯住嘅監倉，有錢囚犯可以住獨立倉，仲可以請人返嚟飲下午茶，囚犯嘅餐飲都有展出，當時嘅囚犯係需要做勞動，因為當時社會覺得"勞改"係有用嘅。

總括嚟講，呢個oxford castle and prison都算有野睇嘅，特別係可以行吓城堡嘅樓梯，但如果要比較，都係The Story Museum適合細路多D。

https://www.oxfordcastleandprison.co.uk/

The Story Museum @ Oxford

預Chirst Church College玩半日，當然要喺牛津搵多半日景點喇。

萬母揀咗The Story Museum，主要係見到佢網頁D相好靚，好七彩繽紛。

The Story Museum (The Galleries)嘅入場券大小同價，都係£10。

一入去先喺The Portal(入口)揀個角色，角色名牌後面有D tasks需要喺參觀期間做嘅，主要都係搵吓野咁。之後就入去The Whispering Wood，一棵棵樹其實係故事樹，埋去拎起聽筒就有故事聽。

再之後就上一層去The Enchanted Library同Comic Library，呢間博物館雖然佔地細細，但因為D展覽都係互動形式，所以可以玩好耐，我哋玩咗兩個鐘，仲要係玩到唔願走嗰種。

小妹覺得呢個The Story Museum比Chirst Church College更吸引。萬母就覺得呢間博物館將故事書入面嘅場景實物化，望落去好吸引，令人好想知個故事講咩，繼而去睇本書。

呢個The Story Museum其實仲有一part類似兒童遊樂場嘅地方，啱5歲以下嘅小朋友玩。

https://www.storymuseum.org.uk/

呢個The Story Museum，萬母盛意推介畀小學雞，因為有足夠視覺刺激，仲可以郁手攪攪震。

Christ Church College @ Oxford

上回去咗劍橋，今回終於去埋牛津喇。

第一站先去牛津大學基督堂學院朝聖(Christ Church College)，入場費一家四口要£50，買飛時要留意，因為有時個great hall或者Cathedral會唔開，如果無得入其中一個景點就好唔抵喇。

入去Christ Church College時，雖然有D地方裝緊修，但仍感受到強烈嘅書卷氣，話晒呢個學院都人材輩出，首相都出過十幾個，仲未計其他著名校友。

The Great Hall其實係學院嘅飯堂，到今時今日仍然有老師同學生喺度開餐，所以平日中午時份係唔開放畀外人參觀嘅，呢個飯堂亦係哈里波特迷朝聖嘅一大景點，因為電影入面，Harry佢哋個飯堂靈感都係來自The Great Hall，可惜小妹一入去就掃慶咁話"呢度得3張檯，Harry佢哋有4張，都唔一樣"。

除咗飯堂，另一個重要景點係教堂，英國嘅教堂真係好宏偉好靚，D彩繪玻璃靚到令人驚嘆。

https://www.chch.ox.ac.uk/plan-your-visit/tickets

雖然基督堂學院唔算好大，但我哋都盪咗差唔多兩個鐘。

去得基督堂學院，門口嘅Alice's Shop一定都要入一入嘅，舖頭細細，但遊客不絕，所以都幾迫。

點解.....點解牛津大學關愛麗絲事呢？原來愛麗絲夢遊仙境個作者(路易斯·卡羅)係基督堂學院嘅講師，而主角愛麗絲係院長個女，路易斯湊細路(愛麗絲)時就講咗愛麗絲夢遊仙境呢個故事畀愛麗絲三姐妹聽，而呢個故事之後仲出版埋，攪到全世界都識。所以牛津有好多愛麗絲嘅精品，而基督堂門口更加有愛麗絲舖頭(呢間舖頭喺故事入面係綿羊開嘅舖頭)。

牛津Christ Church College真係值得去，吸一吸日月精華，提昇吓D文化氣息都好，話唔定有朝一日可以做牛津學生。

Toilet Map

又到暑假，當然係出街玩嘅旺季，出街玩最怕係咩呀？咪人有三急，但搵唔到廁所囉。

呢個toilet map真係可以幫到手，只要輸入地點，地圖就會顯示附近廁所位置，雖然未必係100%準確，但起碼有個目標去搵吖，特別係帶住急嘅細路，不能多走冤枉路。

https://www.toiletmap.org.uk/

返工記

萬母喺年初時搵咗份兼職監考員嘅工，剛剛過去嗰兩個月考試季就密集地返工，而家忙完可以分享吓返工見聞。

英國嘅考試同香港嘅考試雖然有好多唔同嘅地方，但試場嘅環境同香港嘅其實都差唔遠。不過最唔同係英國嘅公開試係返原校考，唔係好似香港咁，要去其他學校考，所以點解學校要請外面嘅監考員嚟監考。

萬母返嗰間係區內比較不受觀迎嘅中學(萬母自己都想知點解，或者係天父覺得萬母適合服侍呢D學校嘅學生喇)，any肥，由於學校不太受觀迎，自然會有比較多SEN學生，而英國照顧SEN考生係幾周到嘅，除咗大嘅考試hall，仲有其他細房畀呢D SEN學生。

SEN學生除咗可以加時25%，仲可以讀卷，用電腦打答案代替用筆寫，甚至可以有TA喺旁邊代筆，有個別特殊需要學生係有獨立房間考試，監考員一對一咁。

可能上頭覺得萬母嘅電腦技能都唔錯，所以大部份時間，萬母都係被編喺電腦房監考，睇住D學生用電腦讀卷，要幫個別學生印佢打好嘅答案。

咁呢兩個月，萬母有咩見聞呢，先前提過呢間學校麻麻地，所以唔係所有學生都咁喜愛返學同讀書嘅，試過有學生遲到成個鐘，然後被副校長帶入嚟試場，學生嘅頭髮染到綠色/紫色都可以照返學，個妝濃過萬母結婚嗰晚，D假睫毛長到萬母懷疑佢睇唔睇到份卷，有d學生唔係著校服返學，係著件低胸背心，露出好成功嘅事業線。

英國GCSE係要求用黑色原子筆作答，但D學生好似唔知咁，有D甚至兩手揈揈咁嚟考試，筆冇，間尺冇，鉛筆冇，擦膠冇，計數機都冇。好彩原校老師早有準備，有大批文具可以借畀佢哋。

考GCSE班year 11學生雖然都係無心向學，寫唔夠10分鐘就瞓嘅比比皆是，但都唔及班year 9學生，呢班學生聽聞係人生第一次接觸"考試"呢樣東西，所以完全唔知考試嘅規矩，一邊用電腦讀卷一邊上google search答案，或者係嘗試同其他同學傾計，萬母對住佢哋嘅感覺，有D似同班小學一年級學生第一次默書咁，完全唔識死，又抄書又企起身睇同學咁，全部要重新教育，但最煩係要用英文教育，如果係講廣東話，大把道理可以講得掂，用英文真係考起萬母，有個學生堅持佢已經做完份卷，唔想等到考試時間完，最後要勞煩到訓導主任嚟訓話(聽聞隔離房要出動到校長)，幸好係考多兩日，佢哋終於知道考試嘅routine係點，唔駛再咁勞氣。

返工後嘅感想：要學好D英文，好到可以隨心所欲咁鬧人。

英國考試小貼士：
💡主要用黑色原子筆作答，要寫喺作答範圍內，四邊框框以外嘅地方唔好寫野，因為D卷最後會被切邊，過機scan入電腦。
💡唔用得塗改帶嗰類，有咩唔要就畫咗佢。
💡畫圖可以用鉛筆，準備埋擦膠。
💡考數學會用到間尺，圓規，量角器，計數機(其中一份卷唔准用)。
💡所有文具可以入喺透明筆袋，帶入試場。
💡電話，手錶，紙巾都唔帶得入試場。
💡水樽要透明，有招紙嘅要先撕走。

#圖文不符
#圖為學校圖書館嘅poster
#其實人人都係天才
#又何必被考試嘅框框困住

Mersea Island 七彩小屋島

英國雖然係一個島國，但係想見海都唔係咁易，嚟咗年半都冇見過個海，小妹嗌去海灘都嗌咗成年，終於出發去海邊。

今次去嘅係Mersea Island(默西島)，係英格蘭有人居住嘅最東面嘅一個島，呢個島最出名係沙灘上面嗰D七彩小屋，粉色系列嘅小屋真係打卡熱點。

呢個海灘絕對唔可以用水清沙幼嚟形容，因為大部份嘅地面都係石仔，雖然未至於𠝹腳，但著拖鞋會較明智，海水比想像中暖，但因為太似泥水，所以萬母都禁止小妹落水，只係喺海邊玩吓水，推吓沙(石)，咁都可以消磨幾個鐘。雖然海水好暖，但岸邊都幾大風，企喺岸邊吹風係會覺得凍嘅，好似萬母呢類麻煩嘅港女，就要邊防曬邊保暖喇。

Mersea Island其實都盛產海鮮，朋友都有介紹我哋去食海鮮，但因為萬能家唔太好海鮮，所以就冇特別去試喇。

最後要提一提，Mersea Island係一個潮間島，同英格蘭主島係有條堤道相連，潮退時可以揸車出入，但潮漲時海水會淹泳沒堤道，所以出行前要檢查吓潮汐時間，以免被困小島。

https://www.tidetimes.org.uk/west-mersea-tide-times

West Mersea Beach旁邊有收費停車場，但其實附近嘅街都可以搵到免費停車位嘅。

https://goo.gl/maps/9v7EkuQ7JVXdwEgLA

https://visitmerseaisland.co.uk/

大學畢業~英文證明

上回講咗申請永居，要考英文試，但其實大畢業生係可以用個學位嚟證明英文水平，唔駛再考試。

首先，個學位係要用全英文授課，而且只限本科學位，碩士學位或者博士學位，其他文憑唔計。

如果係英國以外嘅大學，要做學歷認證(an Academic Qualification Level Statement (AQUALS))，證明個學位等同英國大學嗰D，如果係非英語地區嘅大學畢業生，仲要做埋English Language Proficiency Statement (ELPS)證明個學位係用英文授課。

但其實AQUALS同ELPS都係同一個機構做。主要都係上網Upload D文件，再畀錢等認證。

需要嘅文件如下：

📎畢業證書(Final certificate)

📎成績單(Transcript)

📎大學出嘅英語授課證明信(Medium of Instruction letter)

頭嗰2項都應該即時喺手，但Medium of Instruction letter就要同大學申請返，而且要收錢添，大約係HK$30左右。

呢封信，一定要有個人資料，萬母第一次問大學拎信時，好快收到回覆，話成間大學所有學位都係用英文授課，但呢封信被彈回頭，因為太generic，跟住就要畀錢申請一張專屬證明。

只要齊晒D文件，去下面個網申請就可以，申請費連郵費大約£170，平唔過考試費，但就唔駛再考試，而且呢張證明唔會過期。

https://www.ecctis.com/visasandnationality

交齊文件，大約10個工作天就攪掂。但係萬母前前後後攪咗兩個月，原因係封medium of instruction被彈回頭，同埋另一封medium of instruction攪得比較波折，又話postgraduate同undergraduate要填唔同表格，跟住聯絡嘅email又落咗spam，白白等咗成個月，先聯絡得上，好彩最後都攪得掂。

如果有大學學位，真係做學歷認證好過再考英文試喇，一來唔會驚過期，二來學歷認證咗，話唔定將來有用。

永居英文試

要申請喺英國永遠居留，除咗要pass Life in the UK試，仲要英文達到一定水平。

下面會講吓有咩英文試可以考，但有樣野要留意

英文試有效期只係2年！

英文試有效期只係2年！！

英文試有效期只係2年！！！

所以，唔駛咁快考試，起碼住滿4年先去考。

英文試都分唔同grade，要申請永居，最低要求要B1 (B2, C1, C2係更高級，要求會更高)，而B1試都有兩大類，一種係2-facet，只考聆聽同口試，另一種係4-facet，聽說讀寫都要考。如果目標只係申請永居，2-facet應該會易D同平D。

個表列咗唔同英文試嘅考試費，2-facet係£150 (2022年7月計)，4-facet係£180-200，所以目標為本嘅話，考2-facet就夠數。

IELTS Life Skills– B1 Speaking & Listening，呢個試大約考22分鐘，結果係Pass/Fail

https://www.ielts.org/about-ielts/ielts-for-migration/united-kingdom/ielts-life-skills

LanguageCert International ESOL SELT B1 (Speaking & Listening)，呢個試大約考11-13分鐘，同考官online面試，100分滿分，60分合格

https://www.languagecert.org/en/language-exams/english/languagecert-selt/b1-sl-2734

PTE Home B1，呢個試大約考22分鐘，係戴住headphone對住電腦講野，呢個試適合D唔想對住真人嘅宅男/女

https://www.pearsonpte.com/selt-tests/pte-home-b1

Graded Examinations in Spoken English (GESE) Grade 5，呢個試大約考10分鐘，呢個試分2部份，第一部份要事前準備同考官傾咩，第二部份就即場發揮，即時對話。

https://www.trinitycollege.com/qualifications/SELT/UKVI/B1-GESE-grade-5

4個主辦機構嘅試都各有特色，可以根據自己嘅需要同喜好去揀，但亦都可以留意吓屋企附近有邊個試場。

其實如果有大學學位，而個學位係用全英文授課嘅，係可以申請豁免英文試，下次講點做。

重要事情要講多幾次。

英文試有效期只係2年！

英文試有效期只係2年！！

英文試有效期只係2年！！！

唔好心急考。