英國小學補充練習

小妹嚟到英國讀書，最開心就係冇功課做，又冇測驗考試，放學返屋企就玩玩玩同玩。起初萬母都覺得好開心嘅，因為唔駛再追功課，禮拜六日又唔駛溫默書，可以出街玩。

但慢慢地，又開始擔心，唔知小妹跟唔跟得上學校進度，所以萬母就虎媽上身(？！)，買咗D補充練習畀小妹做。

先戴頭盔，如果你唔贊成呢套，可以skip唔睇，同埋萬母只係分享用家心得，同呢間出版社冇關係，冇回佣收，亦唔做代購。

想買練習畀小妹做，但又唔知點入手時，就見到呢個出版社有呢種10分鐘練習，每本總共分3個term(autumn, spring, summer)，每個term有12個練習，每個練習有2頁紙，預小朋友10分鐘可以完成。

萬母同小妹商量好，term day星期一至五，每日做一本一個練習，即係每日做10分鐘，呢個份量，小妹都可以接受到，做完練習之後，萬母幫佢對答案時，就知道小妹有咩唔識，可以即時教返佢，或是連萬母自己都攪唔明時，就拎本Revision Guide出嚟同小妹一齊睇。

呢個出版社其實有好多唔同類型嘅練習，但因為第一次買時唔知點入手，就揀咗呢種10分鐘練習，如果各位書僮知道自己主子有咩弱項，都可以針對弱項嚟補補佢。

https://www.cgpbooks.co.uk/

買滿£30，免費送貨。

買滿£75，9折。

買滿£150，65折。

搵埋鄰居好友一齊夾單就抵喇。

英國小學課程-KS2 數學

上上回講到萬母為咗知道小妹返學學緊咩，就上網買咗本英文科課程綱要，睇得英文科，當然唔會走甩數學科。

其實英國小學數學科要學嘅內容，同香港小學數學科大同小異。

下面列咗一D英國小學數學科有，但香港小學數學科冇嘅課題。

📌負數 negative numbers

📌羅馬數字 roman numbers (香港當增潤課程學)

📌11及12乘數表 (香港只學到10)

📌質數 prime number 及 質因數 prime factor (質數香港都係當增潤課程)

📌平方數及立方數 square and cube numbers

📌數列 number sequence (香港奧數會學)

📌英制單位 imperial units (香港只學十進制)

📌用量角器 protractor 

📌角度規則 angle rules 

📌座標 coordinates 

📌反射 reflection 及 平移 translation

另外，乘法嘅直式同香港學嘅有少少分別，香港係先乘大位值，英國係由個位乘起，見附圖。

好多書僮都會覺得英國數學科比香港數學科淺，如果只計運算嘅數字大細，的確係嘅，但如果要理解文字題，香港學生可能會覺得困難，仲有D解難題(problem solving)，要學生理解咗題目，再分步搵答案，呢類題目都係香港學生要多學習嘅。

下次再講書僮點樣輔助幼主學習。

Mountain Warehouse

本來萬母已經準備好一篇"學術文章"，講吓英國小學數學課程，但係...有D野更想分享，就係濕平喇。

女人想濕平係唔需要特別原因嘅，唔駛話因為轉季，唔駛話心情差，唔駛話天氣好，總之想買就買。

今次買Mountain Warehouse，主要係戶外用品店，但其實衫褲鞋襪，露營用品都有得賣。

萬母幫小妹喺呢度買咗softshell jacket同防水褸，方便小妹返學時著。

點解愛上咗Mountain Warehouse，除咗因為佢買滿£50就免運費，最重要係佢無痛退貨，買咗返嚟唔啱著或者唔啱心水都可以退，退貨仲要連運費都唔駛。

退貨理由甚至包括一次訂咗幾個碼，退返唔啱碼嘅貨，呢招真係學到野，簡單係將試身室搬返屋企，宅人最愛。

https://www.mountainwarehouse.com/

Colchester Zoo

今次去Colchester嘅主要景點其實係Colchester Zoo，當初誤打誤撞揀咗呢個動物園，之後再聽口啤唔錯。

動物園入面有好多唔同種類嘅動物，部份仲可以有互動環節。

由於小妹熱愛餵動物，所以我哋都專登加購餵長頸鹿同大象，餵嘅過程約莫10分鐘，但小妹玩得好開心，隻大象仲要好似識數數咁，等齊兩小妹嘅紅蘿蔔先肯收鼻。小妹由細時餵魚，餵鴨，到之後餵斑馬，餵獅子，D動物越餵越大隻。

不過最刺激都係餵澳洲鸚鵡食花蜜，喺入雀籠之前可以畀錢買一小杯花蜜，拎住入去就會有雀仔埋身，雀籠入面住咗一批進擊的小鳥，就算冇花蜜喺身佢哋都照上頭，由於D小鳥太進取，萬母只能拋夫棄囡，衝到出口，留低小妹同小鳥玩遊戲。

動物園入面仲有室外遊樂場，小朋友都玩到唔捨得走。

Colchester Zoo絕對係值得去嘅景點，特別係鍾意動物嘅朋友。

https://www.colchester-zoo.com/

入場費： 大人£26.99，細路£18.99，上網買會平少少

餵長頸鹿/大象: £20 (一種動物，每次最多5人參與)

Castle Museum @ Colchester

趁住half term break出外走走，今次去Colchester(科爾切斯特)，英格蘭東部嘅一個城鎮，係英國有歷史紀錄以嚟最古老嘅城鎮，亦係羅馬英國嘅第一個首都。

呢日嘅主要景點係Colchester Castle，呢個城係一個11世紀諾曼城堡，保留羅馬風格，由於小妹返學學過呢D英國歷史，所以萬母專登帶佢哋嚟行吓。兩大兩小入場費£30。

呢個城堡博物館唔算大，有兩層，但都算好多互動設施，可以用£1租部ipad，一邊行一邊聽介紹，甚至有好多衫褲道具可以玩角色扮演。呢個博物館都算kids friendly。由於係學校假期，仲有個dragon show睇，不過呢個show就比較適合細年紀嘅小朋友。

https://colchester.cimuseums.org.uk/visit/colchester-castle/

Castle Museum隔離有個Hollytree Museum，免費入場，呢個Hollytree Museum細細地，但都幾得意，入面擺咗D古時嘅家居用品同玩具，可以畀細路了解吓以前嘅生活。

https://colchester.cimuseums.org.uk/visit/hollytrees-museum/

Castle Museum同Hollytree Museum都係喺Castle Park入面，呢個公園除咗有兩個museums，仲有兒童遊樂場，又有天鵝，所以喺呢度我哋都已經玩咗大半日。

Colchester之旅待續......